Na lolofi atu le mamalu o le atunuu se‘i tagai foi i le tamaitai o loo auai i nisi o ata tifaga Samoa e pei ona silafia ai, le afioga ia Aumua To‘afa Te‘o (Laulii & Samatau) i le po o le Aso Toonai, aso 25 o Ianuari.
O le autū tonu o lea afiafi o le fia faalauiloaina o le CD pese a le afioga ia Aumua, ua faaigoaina, “O lo‘u taimi lenei.” E pei ona muai ta‘ua, o le afioga ia Amua o loo faatinoina nisi vaega i ata tifaga Samoa e pei o le Tautoga Gausia, Suasusu ma le Meli aemaise foi o se tamaitai sa puleaina le fale faafiafia o le Fiafia Nite Club i Aukilani i ni aso ua taunai.
Na malaga faatasi mai le tamaitai pese ma se tasi foi o alo o le atunuu na iloga lona tulai mai i le sailiga taleni a Niu Sila i le tausaga talu ai, le NZ’s Got Talent 2013, le susuga lea ia Si‘uleo Vitale. O le fofoga o le po poo le MC, o le susuga ia Pulotu Canada Alofa McCarthy.
Sa lagolagoina malosi lenei faamoemoe e le afioga i le aloalii ia Galumalemana Naea Tagaloa Harry ma le faletua ia Apu Wendy Timoteo o le Enchiro Laei, Containers faapea Diane ma Mika Nansen o le Enchiro Screen Printing.
Sa maualuga le po auā sa iai nisi o sui o mafutaga faapea le loaloa o le atunuu ae sili ai foi le lagolago a le Convenor o le alaleo 4eb, le afioga ia Tauiliili Suni Pepe Patu ma le faletua faapea le aufaigaluega sa auai.
O le faaili mālie ma le logologoā a le One Sound sa faafiafiaina le po, le susuga ia Eric Pepe ma le vaega. Sa fesuisuiai le faagasologa o le po auā e lē gata o fatuga a le tamaitai pese ae o le sioa o le atunuu i le alii pese ia Si‘uleo Vitale faapea se tasi o tamaitai sa lagona foi lona siufofoga mālie i lea afiafi.
E tusa ma le $5,000.00 le seleni sa tauaaoina i lea afiafi.