“Ua faia e le Alii mea tetele mo i tatou; ua tatou fiafia ai.” Na faatumulia se tasi o malu i le pitonuu o Fawkner i le Aso Toonai na mavae atu nei, i le paia ma le mamalu lasilasi o Samoa, mai lava i ao o faalupega, le aufaigaluega totofi a le Atua ma o latou faletua, mai le pulega a Melepone atoa, faapea le lasilasi o Ekalesia eseese, ae faapea foi tupu ma tamaalii, le faleupolu o tofiga, tuaa sinasina ma Samoa uma na potopoto, e lagolagoina ma sapasapaia le Tausala a le EFKS a Glenroy, lea sa faataunuuina e faamanatu ai le atoa o le tasi tausaga talu ona faaulufale lo latou malumalu e pei ona iai nei.
Na lē gata i le manaia o le mafanafana o le aso, ae na atili matagofie ona o le lalelei o le laei tasi o le Ekalesia malosi. Na mua lava foi mea i Matautu Sa i le sauniga na taitaia lava e le faafeagaiga a le Ekalesia a Glenroy o le faifeau toeaina foi lea o le pulega a Melepone tutotonu, le susuga a Paul Gray ma lona faletua ia Taulogomai Gray, ona alo ai lea i tiuga ua masani ai Samoa i ana tu ma agaifanua mo aso tetele faapenei.
O le fofoga o Seufalemua Savelio na faatautaia le aso auā Samoa na afifio ma talaaao atu.
Na molimauina le lagolago malosi o Ekalesia uma o le matagaluega ma le pulega, e amata mai lava i faafeagaiga ma faletua e oo lava i le loaloa o Ekalesia taitasi, ae faapea foi Samoa uma na potopoto, ona o le aao mafola.
Na ta‘ape le mamalu o le aofia ma le mama ua lomi ona o faaaloaloga ua maualuga a le Ekalesia, e lē gata o le taumafataga felanulanuai, ae o laufofoga fiafia ma le tausaafia. Maualuga foi le viiga o le silisiliese ona o le aao mafola o Samoa le atunuu pele, ua maua ai se seleni tele auā le faaleleia pea o le galuega a le Atua. O la a le tusi, “E te faia e oe mea sili, ma e sili ai lava”.
