Ua 50 tausaga talu o na faavae le mafutaga lenei a le afioaga o Leauvaa i totonu o Aukilani, e pei la ona iai le faamanatuina aloaia sa alo atu sui o le afioaga i le Aso Sa o le faaiuga o le vaiaso talu ai. Afio Tuala ma Sala ma lo la ma‘opu ma le Aiga Sa Tuala, tainane le falevalu ma le falesefulu, mamalu i lo oulua toalua ia Tevaga ma Vaifale ma upu i le Salemuliaga.
O se faamoemoe ua leva ona tapena i ai le mafutaga ma le manatu maualuga ina ia tino mai tapenaga i se tulaga lelei i le faamanatuina o le 50 tausaga, ona e lē o ni tausaga laiti nei tausaga. Na amata tatala aloaia le faailogaina o le 50 tausaga o le mafutaga i se sauniga o le misasa na faia faapitoa i le malumalu o le Ekalesia Katoliko St. Josephs Parish i Grey Lynn.
E pei o tu ma aga e masani ai Samoa, e mua lava mea i Matautusa a o lei alo mo faaaloaloga masani ma le taumafataga tele na faaiu i ai le polokalame o le aso fanau na faia lea i le maota tele o le Ekalesia Katoliko i le Malaeola Hall i Magele.
Sa faatumulia le faamoemoe, e le gata i sui taitasi, o aiga, o tuaa sinasina o le mafutaga, le autalavou, Afioga i Patele ma le maave eseese o le auvalaaulia, aemaise sui o le Palemene o Samoa na auai i le faamoemoe o Leauvaa. Na mae‘a le taliga o le sua, ona sosoo lea ma faaaloaloga faa-eaganuu e masani ai, faapea faafiafiaga matagofie na alo i ai le mafutaga a le autalavou o le afioaga.
O le mafutaga lenei a Leauvaa o loo Peresitene ai le Afioga Sala Faumui ma lona sui Peresitene, o le susuga Vaifale Silao, o le Failautusi o le faletua ia Merita Sala ma le teutupe o le Afioga Muliagatele F Costa, faapea sui o le laulau a le autalavou o le afioaga Leauvaa, o le susuga ia Paul Vaifale, Filimoni Tuano, Rita Vaifale ma Agnes Seiuli.
O le faavaeina o lenei mafutaga o se faamoemoe ia tuufaatasia ai pea le nuu, ia maua pea le fealofaniga o le tupulaga talavou e ola ma soifua ane i totonu o Niu Sila nei, lea o loo vaaia pea le faatupulaia ma le maopoopo o le mafutaga a tama ma teine Leauvaa i totonu o Aukilani.
Tele ni matafaioi na nafa ma le mafutaga i le fesoasoani ai lea i le afioaga i Samoa talu ona faavae. O nisi o maa faamanatu o galuega a le mafutaga, e pei ona iai le latou mau tauave, “Galue ma Tatalo” o le faanofoaina lea o le falesa i Samoa i le 1963, sa nonofo i luga o fala, peitai o le fesoasoani lea na tauaao e le mafutaga mo le falesa Katoliko i lea vaitau.
E le gata i lea o le tele o le fesoasoani i le toe fausiaina o maota o Faifeau faapea Tamaitai Sa i totonu o le nuu. O le mafutaga foi a Leauvaa na saunia se maa faamanatu i le taimi o le 150 tausaga o le Tofamamao na se‘i mavae atu, ua fai lea ma mitamitaga o le faatumauina o le fealofani ma le maopoopo o sui taitasi o le mafutaga.
O le faia pea o nei tuufaatasiga a le afioga, o se fesoasoani tele foi lea i tupulaga lalovaoa o le afioaga e ola ma soifua ane i totonu o lenei atunuu.
