O le manatu tausili ma le tauivi ina ia fausia ma faamautuina ni moemitiga auā ni atina‘e manuia, e taofi le tagata faimea lelei e leai lava se tuaoi e ui e tele papuipui e foliga e faalavelave mai.
O se lagona lea na maitauina e le sui o le tatou nusipepa ina ua faatasi atu i le faamanatuina o le 5 tausaga talu ona faavae mai le mafutaga ua faaigoaina o le Auuso (Brothers) i le latou nofoaga autū i Magele.’ O se faamoemoe na matuā lava tapenaina i itu uma e pei ona maitauina e le tusitala.
E le gata ina faatumulia i sui o le mafutaga, ae faapea foi nai o latou tauaiga ma uo mamae sa mafai ona faatasi atu auā le patipatia o le alofa ma le agalelei o le Atua ina ua aulia mai ma le manuia lenei faamoemoe sa pei e na o se miti i mafaufauga, peitai o lea lava ua tino mai i le alofa o le Alii.
Sa faapea ona faatasi atu i ai ma le afioga i le Faipule o le Malo o Niu Sila le afioga Su‘a Viliamu Sio, o le sui foi o loo lagolagoina malosi e le pitonuu o Magele.
O le susuga i le Aoao o ia foi lea o loo fai ma Taitaifono a le mafutaga le Tofa Faamatuainu Ieremia, o ia lava lea sa nafa ma le faataunuuina o le sauniga lotu.
O ia foi lea sa fai ma fofoga o le mafutaga e faafeiloaia le afio atu o le afioga i le Faipule ma faaauau ai loa le polokalame o le aso. Sa maua le avanoa na saunoa ai le afioga Su‘a ma ia faafetaia ai tupu ma tamalii o le mafutaga ona o se faamoemoe mautu ma le tapena lelei vaega uma o loo faavae ai lenei mafutaga e ala i ona talitonuga ma ona vaaiga mamao.
Na mae‘a ona saunoa le afioga i le Faipule ona talifuaitau lea o le faatamā o le mafutaga, le afioga Vaele Poloaiga ma ia faafetaia foi Su‘a e tusa ai ma se tofa ua a‘e ua asia ai le faamoemoe a le mafutaga.
Sa faaiu le saunoaga a le afioga i le faatamā e ala i faaaloaloga masani e pei ona lausilafia ai si o tatou atunuu i ana tu ma aga, auā malo ma valaaulia faaaloalogia.
O le mafutaga o le Auuso, o se faalapotopotoga o loo faapea ona fausia lea i ni tamā ua fai o latou aiga, faatasi ai foi ma taulelea o loo tau saili pea ni o latou ama. O ona faavae mautu ma ona talitonuga poo vaai mamao foi, o le iai lea o se mafutaga e faamaopoopoina ai ni suiga foi mo le itupa o tamā.
O le Atua le faavae o lenei mafutaga, ae o le naunautaiga ia iai se faalapotopotoga e faatasitasi ai ni tamā ma maualafia ai ona faamalosi le tasi i le isi i auala e mafai ona fausia mai ai ni aiga mautu ma le ola fiafia.
O le tele o taimi e faatasitasi ai ma toe faamanatu tu ma aganuu e pei o lauga i soo se vaega, o solo ‘ava, tautuina o le ‘ava ma vaega tāua uma e pei ona mamae ai le aganuu Samoa i ona tagata.
O le tele o taimi e fai ai a latou taaloga e pei o le piliaki, o le mu, ma le pele suipi, e pei o vaega ia o loo taofia ai le agaga fia mafuta o ona sui uma. O se mafutaga fealofani ma le feoeoeai.
E lē natia ni ona faaletonu ae faatalanoaina pe a tau vaaia ni luitau mai ona sui taitasi, ona o le faanaunautaiga a le faatamā, le taitaifono ma le laulau, ina ia aua ne‘i nunu le toau, pe avea foi le se ma ala e fatitu ai le sologa lelei o le mafutaga e pei ona iai nei.
Na ta‘ua e le susuga i le Aoao ia Faamatuainu Ieremia, o le viiga lava ia e foi i le Atua ona o Lana taitaiga ua aulia mai ai lenei 5 tausaga, ma o le vaai mamao ina ia toe aulia atu foi le isi lima tausaga o lumanai.
O le Faamatuainu Ieremia ma le susuga Afa Poloaiga, o i laua ia sa tausolomua i le tuufaatasia mai o lenei mafutaga i le amataga seia oo mai lava ina ola ma faamanuiaina e le Atua. O nisi o ona sui e iai le susuga Mose Aipopo, Seuamuli Sinave, Sefo, Herman, Too, Leuluai Afano, Niusila Auelua, Maota, Afoa, ma le toatele ua lē maua uma o latou suafa.
O le taimi nei, e toa 19 sui resitala o loo iai i le mafutaga. O afiafi uma o Aso Faraile e faatasitasi ai le Auuso i le maota o le susuga Afa Poloaiga mo le faataunuuina o a latou taaloga, ae faapea ai foi ma a latou fonotaga.
