Ova totogi pasese o taavale la‘upasese
O se tasi lea o soligatulafono o loo alia‘e mai pea ma e lē o ‘alo ai lava le Matagaluega o Leoleo e molia ai ave taavale latou te tuuina ni tau lē talafeagai i tagata o loo faaaogāina la latou auaunaga.
O loo tulai mai pea i ave taavale la‘upasese e ova totogi ai pasese o le mamalu o le atunuu aemaise i tagata tafafao maimoa mai fafo poo tagata Samoa foi o loo aumau i atunuu mamao.
Ua faamanino mai e le Sui Sooupu o le Matagaluega o Leoleo, Leaupepe Fatu Pula, e tatau ona fealuai soo se ave taavale la‘upasese ma sana lisi o tau o pasese.
“O le aiā tatau foi a le pasese poo le tagata tietie le fesili i le ave taavale mo lana lisi o pasese pe afai ua lē talafeagai le totogi e tapa e le ave taavale,” o se saunoaga lea a Leaupepe.
O se tasi o mataupu i lea faaletonu, na tulai mai i le vaiaso talu ai, na oo atu ai se tasi o alii palagi mai Ausetalia i le Ofisa o Leoleo ona o se ave taavale la‘upasese na malaga ai agai i Faleolo. Sa malaga mai lea alii i le uafu agai i le malaevaalele i Faleolo ma e $40 tala Samoa na ia totogiina i le ave taavale o le taxi 339 ma e lei talia gofie i le mafaufau o le palagi ma agai mai ai loa i le Ofisa o Leoleo i Apia.
Ua iai lava totogi faatapulaa ua faia e le Matagaluega o Taavale Afi ma Femalagaiga i le Laueleele (LTA) ma e fautuaina ai e le Matagaluega o Leoleo le mamalu o le atunuu e tapa se fesoasoani mai le Matagaluega pe afai ua lē talafeagai se totogi e tuuina atu e soo se ave taavale la‘upasese.
Pē soo paipa i le toese i Tafaigata
E tusa ai ma ni tuuaiga e faapea, o le tele o aso e pepē ai paipa i le toese i Tafaigata, ua faamanino mai ai loa e Leaupepe Fatu Pula lea tulaga.
“E iai taimi e pepē ai paipa ae peitai o loo iai tane e silia ma le 10 i totonu o le lotoā o loo faasoasoa pe a pē le vai,” o se saunoaga lea a Leaupepe.
Na ia ta‘ua foi, o loo tālia le taimi e faagaioi ai se talosaga sa ave a le Matagaluega o Leoleo ma Falepuipui i le Matagaluega o Suavai e tali ai i taimi e pepē ai paipa. Ua talia e le ofisa o le vai lea talosaga ma o le a vili le vai fou i Falelauniu.
E talitonu le Matagaluega, o le a ola lea pamu ma malosi ai le vai e agai i le vaega o loo iai le falepuipui ma foia ai lea faafitauli i le pepē o paipa.
Faia suesuega i le tino maliu o se Filipino
O loo faagasolo pea suesuega a le Matagaluega i le tino maliu o se alii Filipino sa malaga mai i se vaa fagota o lo latou atunuu sa fagogota i ogasami lata mai i Samoa. O lea alii e 21 ona tausaga, sa ia tuua lona aiga i le aso 5 Iuni o le tausaga nei ma o le aso 8 o le masina nei lea e faapea na gasegase ai i luga o lo latou vaa fagota ma mafua ai ona maliu.
Talu ai ona ua afea lo tatou atunuu e lea auvaa mo ni togafitiga i lē ua maliu, lea ua faia ai loa ma suesuega i lona tino maliu se‘i vaganā ua mae‘a ona faato‘ā faafoi lea o lona tino maliu i lo latou atunuu.
O le kamupani o le Betham Brothers lea sa fesootai ma le auvaa lea o le MV Maru mai Filipino ma o le a galulue faatasi le kamupani vaa a Samoa ma le Matagaluega o Leoleo i le toe faafoiina atu o le tino maliu o lea alii i lona atunuu.
