E masani a talanoa loa i le faailogaina o se atoaga o le 21 tausaga ua aulia, e muamua lava manatu i le ki o le saolotoga, peitai sa lē faapena se lagona i le alii o Silivelio Fasi, ae sa ia faaalia i le tusitala ma sana molimau, o lona laaina lea o se isi itulau fou o lona olaga mai le tupulaga talavou ae avea ma taulealea e tautua lona aiga aemaise lana ekalesia pele.
Na matuā faatumulia le faleaiga o le Workman’s Club Woolston i le mamalu o le au valaaulia aemaise aiga ma uo a Silivelio i le molimauina o le faailogaina o le 21 tausaga o lona soifua i le aso 19 Novema 2011.
Toatele aiga na malaga mai atunuu mamao faapea pitonuu o Niu Sila, aemaise ai lana Ekalesia pele St Pauls Trinity Pacific Church.
Na soifua mai lenei alii talavou i ona tuaa o Vaifale Tumua (Levi Saleimoa) ma Auteletoa Fasi (Leauvaa) e ogatotonu o ia mai ona tuafāfine e toalua, ma o loo ia faigaluega malosi i le taimi nei e fesoasoani i le aiga.
O le faamoemoe o Silivelio e fia faaauauina lona taumafai i le Iunivesite mo lana mataupu o le Arts (artist). O se taitai mataalia e taulamua i le faamaopoopo o tupulaga, o se alii e talenia i musika faaonapo nei ma taga eseese.
Sa muai amatalia le faamoemoe i le lotu faafetai faapea upu apoapoai na saunia e le susuga faifeau malolo, Rev Samoa Mavaega ma Rev Robin Walsh. Na sosoo ma le tuuina atu o le ki o le 21 pei ona foaiina e lona tamā o Vaifale Tumua faatasi ai ma moomooga alofa mo le atalii, ae sili ai le faafetaia o le alofa laveai o le Atua i Lana tausi-vaatele i le atalii ua maua ai nei tausaga e tele.
Matagofie le molimauina o le olaga tuputupu a’e o Silivelio e lona tamā ma ona tuafāfine, e faamatala lava e foliga tausaafia o le alii fai aso fanau lana amio i lona lotoifale faaleaiga, fale faigaluega ma totonu o lana tapuaiga ma o naunautaiga ia o soo se matua Samoa e tulimatai mo fanau. O le susuga Rev Samoa Mavaega sa saunia le faamanuia mo le keke lua fogafale mae’a ona teuteuina lelei, ona faagasolo lea o le polokalame na faatautaia e le susuga Suli Tuitaupe, mataina le tomai faapitoa o le fofoga o le aso auā ua masani i faiva faapenei.
Na alo atu le aofia i le taumafataga tele felanulanuai ina ua mae’a ona saunia e le faletua Salote Lapana Faletolu le tatalo faafetai, ae faapena foi ona pesepese mai fika malie a le musika na faafiafia ai DJ Avia Malo (Manunu).
O se aso fiafia ma le lauiula , ua le manofonofo le auvalaaulia e oo lava i loomatutua ma toeaina ua i luga o le malae saasaa, na saunia faafiafiaga faaoso toto maualuga a fanau tupulaga mai le aiga, ua atili ai ona tau lē taofiofi le tina matua o Vui i lona fiafia tele.
Ina ua tau gagaifo le lagona ua fiu e siva, ona alo lea o le mamalu o aiga e lua auā se meaalofa faaaloalo e tusa ai ma le afifio atu o le mamalu i le valaaulia.
O le fetalaiga Faleosina Mulimai Poe na lauama tootoo auā le mamalu o le aofia aemaise le paia o le aufaigaluega a le Atua, ma saunia ai ni mealofa tupe mo susuga i faifeau na auai ma faletua o le aufaigaluega, faatofusia le ofisa tutotonu o le Ekalesia St Pauls i teutusi lapopoa, na matua oo lava le faasoa i afio i tapaau ma aiga, o tulafale faapea tiakono sa auai.
I le mae’a ai o le faatau e tusa ma aso faapenei, o le fetalaiga Vaeafe na fai ma sui o le valaaulia e tali fuaitau tusa ma le maama’au, ua titi manu lava manu ua malie le suavasele i lau pule ua sapaia faatuaeleele.
E pei ona amata mea i le Atua, e toe iu foi i le Atua ma sa faaiuina le faamoemoe i le tatalo saunia e le faifeau malolo Rev Samoa Mavaega, ma tatala loa le filialii foi fiafia le tagata ia i lona aiga.
E faamanuia atu ai le tatou lomiga Samoa Times mo le aso soifua o Silivelio Penitito Vaifale Fasi.
