E moni lava o le ‘ata o se vaifofo sili lea ona tāua i le soifua o le tagata a o iai i lenei olaga o le gaosā ma le felefele mai o le tele o faafitauli.
Na pei e ta‘ene le aumaimoa e ni aitu i le faateteteteina o le ‘ata latou i aga mālie ma le lē kea o le itupa faaleogolua fai mea mafai. Ua lē gata i le suifefiloi o taleni ma faafiafiaga ae o le fesuisuiaiga o latou siufofoga, e leo tamaitai, leo loomatutua, leo alii ma leo toeaiina foi.
O itu nei e mālie tele ai le aualii poo le au lakapi faalilolilo aami faapitoa. O se vaega foi e lē iloa matamuli pe kea lava i se isi, e fai lava latou uiga faaalia, pau lava o le maua o le fiafia ma le ‘ata a le aumaimoa.
O le po o le Aso Toonai, aso 19 o Novema na faia ai a latou faafiafiaga mulimuli.
E $20,000 ma ona tupu se seleni sa maua ia latou taumafaiga e pei ona faafiafia ai i Sini ma Brisbane.
O le faafetai ma le faamalo mo le DIVAS ona o le faaosofia o i latou i le agaga fia fesoasoani i nai alo ma fanau o loo i le Maota gasegase i Motootua faapea nisi o Monike i Samoa.
Na malaga mai i se latou tafaoga ma a‘e ai se manatu e faia se sailiga seleni auā foi lea fuafuaga.
O i latou na malaga mai e aofia ai Velda Collin Fidow – Leufisa, Taufusi, Safotu. Josie Hunt – Taufusi. Tautala Iputau (Tara Pumare) – Gagaifo, Faleaseela, Matautu Lefaga. Resitala Apa – Moataa & Safune. Talalafai Alosina Blonde Ropati – Matautu-tai Apia, Tanugamanono & Iva Savaii. Caprie Brian Maugatai – Tiavea Aleipata & Manunu, ma le taitai malaga, le faletua ia Tuiloma Sonnya Sanft Ah Tune.
E $20,000 ma ona tupu le seleni sa faamaopoopoina i le malaga taamilo i Ausetalia, ma o se agaga fiafia i le aumaimoa a Kuiniselani ona o le lava tapena o le DIVAS ia latou faafiafiaga ma ua toe tulimatai i se isi foi taimi e toe malaga mai ai.
E momoli ai le agaga faafetai a le aumalaga e ala atu i le Samoa Times i le susuga ia Tuiloma Tanu ma le faletua ia Pouli Sanft ma le aiga sa tausia ma faamautu i ai le faiga malaga, aemaise o le paia o Samoa uma lava i Kuiniselani ma Sini mo seleni ua tou foaia ma meaalofa mo le aumalaga a le DIVAS mai Samoa. Faafetai! Faafetai! Faafetai tele!
