Faamanatu faamanuiaga sasaa mai e le Atua mo le aiga

E tasi le aso sa faia ai se fiafia tele sa tuufaatasi a le aiga o le afioga ia Nanai Panapa, ma le faletua ia Mina Tuimalealiifano-Nanai i Aukilani i Sisifo.
O se aso sa faatino ai se fiafia sa tuu e le Atua i loto ma finagalo o mātua ma le fanau ma isi o le aiga, ona o nisi moemitiga, ma faamanuiaga a le Atua ua ausia e le fanau e ala i a‘oa‘oga.
E lē gata i lea, ae faapea foi ona faamanatuina ai le alofa ma le pule faasoasoa ai a le Atua i le matua o le soifua ma aso ua foaiina mo le tamā ma le tina o le aiga.
O le ala foi lea sa lē māmā ai le tatau ona faamanatuina aso fiafia faapea.
O le atoaga o le ta‘i 50 tausaga o le tamā le afioga Nanai Panapa, ma le faletua ia Mina Tiumalealiifano-Nanai sa faamanatuina.
O le atoaga o le 21 tausaga o Nanai Tuitaalili Neroni Nanai, o le isi foi lea sa faaautu i ai lea aso fiafia.
O le tamaitai o Teulevalasi Nanai o le alo o Nanai Panapa ma Mina, sa faamanatuina lona faauuga ina ua mae‘a le taumafai ma sa faauuina i le faailoga o le BSc & Postgraduate majoring in Microbiology & Food Science ia Tesema o le tausaga talu ai 2010.
O le alii o Morgan sa faauuina foi ma avea ma Polofesa (Professor in Politics, senior lecture i le Iunivesite USP i Suva i Fiti).
O se tasi lea o faamanuiaga tāua sa faapea ona faailogaina faapitoa ma faamanatuina i lea lava aso.
O se fiafia tele e pei ona molimauina e mātua ia Nanai Panapa ma Mina, ma faafoi ai le viiga i le Atua ona o ana meaalofa sasaa mai mo le fanau, faapea ma lana tausiga ia i laua o mātua.
O le tala a le faisalamo, ‘Lo‘u Agaga e, faamanū atu ia Ieova, o mea uma foi o i totonu ia te au, ia faamanūina ai lona Suafa Paia’.
Sa molimauina e nisi sa valaauina faapitoa mo lea aso tele, le tāua atoa ai ma le suamalie o lagona ma tala o lea aso. O se luitau tele foi mo nisi aemaise lava o mātua ma fanau ina ia faamalosi ai pea ma unaia fanau mo a‘oa‘oga ma galuega mo lo latou lumanai.
O le afioga ia Nanai Panapa ma le faletua ia Mina, e mai le afioaga i Falelatai i Samoa, ma o loo alaala faamautu ai i Aukilani i Sisifo e oo mai i le taimi nei.