O le fesili lea o loo fia maua i ai e le toatele o le atunuu se tali, ona ua faata‘ape le Palemene lona 14, e lei agiga lava se upu e tasi a le Sui Palemia pe moni upu o lana faamavaega mai le tofi faipule o Falelatai ma Samatau, lea sa agiga i sana tusi na momoli i le Faaloalo a le Aiga Taua‘ana i le tausaga na tea nei.
O lana saunoaga i le tauaofiaga mulimuli a le fono aoao i le po o le Aso Gafua na tea nei 24 o Ianuari 2011, sa ia faafetai ai i matagaluega uma ma faalapotopotoga a le Malo sa auauna ma tautua ai i le tofi minisita.
E faapea foi ona ia faafetai i tofiga i nisi o faalapotopotoga tetele i fafo sa avea ai o ia ma sui o Samoa. Tainane lana faafetai i le ta‘ita‘i ma le vaega faaupufai o le HRPP.
Peitai sa faauigaina lana faafetai e le toatele, o lana faamavaega lea e lē toe tauva i le palota a le atunuu i le aso 4 o Mati 2011.
O le Aso Lua 25 o Ianuari 2011 na faia ai ana faaaloaloga i le vaega faaupufai ma momoli ai foi lana faafetai i tausaga e tele sa latou galulue ma mafuta faatasi ai.
Peitai o upu a le tulafale na fai ma fofoga o le Sui Palemia ma lona aiga le tofa Faleseu Leute, e lei agiga ai lava se faamatalaga i se faamavaega a le Sui Palemia.
Na nanati atu le tusitala o lenei nusipepa ma talosaga i le Sui Palemia e fia pue se ata ma sa ia talia, ae ina ua tatalo atu i ai mo se avanoa e faatalanoa ai, sa vaaia le lē ano ane o le afioga Misa ma faasolo lana faatalofa i faipule o le latou pati faapea nisi o sui lagolago sa auai i ana faaaloaloga sa ta‘i sua uma ai faipule i Ie tetele o le Malo, o teutusi o seleni, ma palapala a malo o manu papalagi, pusaapa i‘a ma pusa pisupo.
Sa toe talosaga le tusitala a o faasolo lana faatalofa ae pau lava lana saunoaga mai, se‘i feiloai atu i lona aiga.
Na sosoo lea ma le agai atu i fafo o le Sui Palemia ma lē toe vaaia ai loa tino ina ua ia tuua le nofoaga autū o le HRPP le maota o Petesa.
Na fesiligia e tusitala le alii Palemia i sona finagalo e tusa ma faaaloaloga, ae sa lē mafai foi ona faaali sona finagalo.
O le fesili pe aisea ua faafiti ai pea ni lagona o le ta‘ita‘i ma le sui ta‘ita‘i.
Na faia sailiga mo le fia iloa lava o le ‘au o le paipa.
O se molimau mai se tasi o le HRPP e lē o se faipule, o Misa ua lagolago i ai afioaga o Pata ma Samatau ma e toe tauva i le palota.
Peitai o le tala a le sui lagolago, e oo lava i le ta‘ita‘i o le vaega faaupufai ma faipule e leai se isi o silafia poo fea tonu o iai le finagalo o le Sui Palemia ma lona faamoemoe i le faigapalota.
O le musumusu a le sui lea, o loo iai se feiloaiga ua na o le ta‘ita‘i ma le afioga Misa o le a faamautu ai lenei mataupu.
O le lisi o sui tauva o le HRPP sa faalauiloa e le Palemia i le faaiuga o le tausaga ua mavae atu nei, o loo matilatila ai le suafa o Misa i le lisi o le sui tauva i le itumalo o Falelatai ma Samatau.
O le a tālia pea se taimi e mapuna mai ai i fafo se tala moni po ua faamavae pe o loo iai pea se agaga o le Laau na Fausia e toe tauva.
