E pei ona manino i ulugalu i le silafia ai e le Ekalesia Aoao Katoliko i le lalolagi atoa, le aso faamanatuina o le Sulufaga o Iesu le Agaalofa mamana.
O le tapenapenaga o lea aso faapitoa na amata mai i le latou Novema iva aso mai le Aso Faraile o le Aso Maliu seia oo atu i le Aso Toonai ua atoa i ai le iva aso ma faataunuu loa i le Aso Sa e sosoo ai.
Na taitaia e le Afioga ia Patele Epati Tamati i se sauniga Paia o le Misasa tuufaatasi sa aofia ai Senakolo o le falelima faapea le paia ma le mamalu o Samoa uma na molimauina.
O le aso foi lea sa faapaia ai faatusa o Iesu le Agaalofa. Na galulue faatasi i le sauniuniga o le taumafataga faapea faafiafiaga sa faamalieina ai le au maimoa.
O le Senakolo mai Marsden o loo faauluulu i le Tofa Faimalotoa Ioane Pale, Senakolo mai Darra o loo taitaia e Malaeulu Aukuso Toleafoa, Senakolo mai Inala o loo taitaia e le Tofa Taualeoo Tolu Pisa Iulio, Senakolo mai Goodna o loo taitaia e Tafaese Faatonu Tafaese, ma le Senakolo mai Woodridge o loo taitaia e Lofipo Costello Afatasi To‘ia‘ivao.
O fuafuaga lava o le aso sa soosootauau taitai uma o Senakolo i le faapolokalameina o le aso.
E tele malo faaaloalogia sa auai, ma sa faamalieina i teuga eseese ma faaaloaloga a Senakolo tuufaatasi a Kuiniselani.
Ia ae mo le silafia ai foi e nisi Senakolo o loo tupu ma ola le galuega i Brisbane e ala i le faatuputupulaia pea o i latou e malaga mai i totonu ma suia ai le soifuaga tuai i se olaga fou.
