Fesiligia le malupuipuia o le maota o le Malo i galuega a Sikulati

Ua fesiligia le malupuipuia o le maota o le Malo ma tagata faigaluega o loo galulue ai aemaise o taitai o le Malo o loo iai o latou ofisa faapea meatotino uma a le Malo o iai, i le tautua a le vaega o leoleo poo sikulati o le maota o loo i le eleele fou i Apia. O le vaiaso talu ai na feiloai ai le vaega o sikulati a le maota o le Malo ma le komesina lagolago o le matagaluega o leoleo le afioga Leaupepe Fatu Pula, ma faailoa ai e le komesina lagolago nisi o vaega taua e ao ona ave i ai le faamuamua i le vaaiga o le saogalemu o le fale atoa mai tagata e afea.

O le feiloaiga lenei e mafua mai i le faaletonu na tulai mai i le Aso Lulu o le vaiaso talu ai ina ua tuu i lalo e se alii le Fu‘a o loo sisi i luma o le maota o le Malo ma susunu se vaega o le tagavai. O le molimau tautino a nisi sa iai i le taimi o lea gaioiga, ana le vave atu nisi o sikulati ma se tusitala o le nusipepa a le malo o le savali semanu e faatamaia uma le Fu‘a i le gaioiga na tulai mai.

Ua faaalia se finagalo o le alii Palemia e faapea o lea alii atonu e iai se gasegase o le mafaufau o aafia ai, fua ina ia faia lea gaioiga. Ua faasea ai le Palemia i se tasi o nusipepa i le latou lipoti e faatatau i le mea na tupu o loo ta‘ua ai, o le lē fiafia o lea alii i le faaiuga ua tuu ai i lalo le maota fono na mafua ai lana gaioiga.

Faaalia e le Palemia ua fai ma masani a lea nusipepa le fai o tala e le moni. E 31 tausaga o le alii o Faatuai Paepae Lole o Mulivai ma Vaiee Safata ua molia i lona faia o lea solitulafono ma o le vaiaso nei e tulai ai i le Faamasinoga Faaitumalo, ae o loo taofia pea i le vaaiga a leoleo.