A o faagasolo ai sauniga a aiga taitasi ma afioaga i Samoa e toe faamanatu nai o latou mātua, o fanau, ma ē pele na maliliu faafuasei i le galulolo o le tausaga talu ai, 2009, ae sa faia foi ni sauniga ma ni faatasiga faapitoa i nisi vaega o Niu Sila, mo lea lava agaga e tasi.
O le Aso Lulu 29 Setema i le vaiaso na tea nei, sa faataunuu ai se faatasiga lauiloa a le Vasega Samoa a le Kolisi a Magele i le latou laumua i Magele.
O se sauniga na auai atu i ai le toatele o le fanau faapea le vasega i faiaoga, lea sa latou faimalaga atu i Samoa i le tausaga 2009.
O le sini autū o lenei faatasiga, o le fia faamanatuina o le latou auai atu i Samoa i le taimi sa afea ai lo tatou atunuu pele i le mala faalenatura poo le galulolo lea sa aafia ai le tele o le Atu Aleipata ma Lalomanu.
Sa auai atu i lea faatasiga le susuga ia Mele Ah-Sam le taitai o lea faigamalaga i le tausaga ua tea, faapea susuga i faiaoga ia Huni Fifita ma Henry Fesulua‘i. Sa lei mafai ona auai uma i lea faatasiga le toatele o le aumalaga.
O le polokalame o lenei faatasiga sa fuafua e faatasitasi uma i le Laumua i le aoga i Magele, ona faia ai lea o se sauniga puupuu e faamanatu ai aiga ma uo ua maliliu i lea mala faalenatura, ona maimoaina ai lea o le tele o ata sa pueina i Samoa a o latou iai.
Na faaiuina lenei faatasiga i se taumafataga faapitoa i le faleaiga o le Gehngis Buffet i Manukau.
Na vaaia le fiafia tele o ē na auai, ma sa avea lea fiafiaga ma faamanatu ia i latou i taimi a o latou faatasi ai pea i Samoa.
O le tasi o fiafiaga tele ona o le faamanatuina lea o le isi tausaga ua faaopoopo mai lea e lo tatou Tapaau Sili o i le lagi i lo tatou ola, ona e faapea o le Aso Lua, 29 Setema 2009 o le aso tonu lava lea na sauni ai lenei aumalaga e agai atu i Savaii.
“Sa momoe i manū, ae sau mala e atia‘e. Sa lilo i o matou loto ma manatu o le a tupu se faalavelave faapenei ia Samoa.”
Sa ta‘ua e Faafetai Fakaua, o se tasi o tamaitai sa auai i le malaga e faapea, o le taeao lea sa latou vave feala ona ua fiafia o le a faimalaga atu i Savaii.
Ae peitai na liua lenei fiafia i loimata o le faanoanoa ma le fefe. Ina ua mae‘a ona lulu le mafui‘e, na latou faapea ai ua uma ai iinā, ae galo ai le galulolo lea o le a sosoo mai.
Na faateia le toatele o i latou i le tala sa tuuina mai i le Leitio Samoa, e lapataia mai ai le sunami o le a oo mai i Samoa.
Sa faateia foi le toatele ina ua latou maua le tala e faapea, e to‘a 14 nisi o le aiga o Taufua lea e fai le latou faletalimalo i Lalomanu, ua maliliu i le galulolo, auā o le Aso Toonai, aso 03 o Oketopa lea sa fuafua ai le oo atu o lenei aumalaga i Lalomanu, ona nonofo ai lea i le Taufua Beach Fales.
