E valu pauna fasefulu tasi aunese le mamafa o le pepe fou ua faamanuiaina ai le susuga le alii faipule o le aai o Maugakiekie, le susuga ia Peseta Sam Lotu Iiga. O se afafine le meaalofa ua foai e le Atua, ua faaigoaina ia Hope Elizabeth Stephenson Lotu Iiga, na fanau i le aso 23 Setema 2010.
O se imeli faafetai a le susuga a le faipule na lafo faalauaitele mo le toatele o tagata na momoli atu faamanuiaga aemaise o talosaga ma meaalofa mo Peseta ma lona faletua ia Jules.
Na ia faailoa mai ai foi lona mitamita ua taunuu le faamoemoe ua avea o ia o se tama, o se galuega e fou o le a ia aoaoina ai.
O Peseta Sam Lotu Iiga e pei ona silafia, ua lua nei tausaga o nofoia le nofoa o le tofiga faipule i lalo o le Vaega Faaupufai a le National, i le pitonuu o Maugakiekie i Aukilani.
