E tele ni fuafuaga sa faatinoina i totonu o aoga amata i le vaiaso ua tuanai atu, e faamanatuina ai ma faatāuaina ai fanau i totonu o aiga. O le tele foi o mataupu aoaoina sa faalauteleina ai ma faamamafaina ai i talanoaga ma fanau le tāua o le toaga e alu i le aoga, o le usitai i mātua, o tu ma aga e tatau ona fai ma faatāuaina aemaise o le ola saogalemu ma le ola saoloto mai faafitauli o le olaga.
Sa maua foi avanoa e faalauteleina ai manaoga ma fiafiaga o fanau i soo se vaega o le siosiomaga pei o le fia avea ma leoleo, fomai, loia ma isi lava moemitiga. O nisi o tamaiti sa fiafia e fia avea ma Superman, Ben-ten, Barbie girl ma isi lava. O le faaiuga la o le polokalame o le faatāuaina o fanau na valaaulia ai e aoga amata a Kids Count le taulealea tautaua o Superman na te asiasia le fanau.
E tolu lālā o lea foi aoga ma na matuā faateia ma faafiafiaina le fanau uma ina ua latou vaaia le agai mai o Superman ma latou mafuta mo ni nai minute o le polokalame.
Na matuā segia mauli o nisi o le fanau ma lē mafai ai ona latou fia tuua Superman e alu ese atu, ona o le faateia ma le fiafia tele auā ua latou vaatino nei ma mafai ona pa‘i atu ia Superman. E oo mai lava i le taimi o loo talanoa pea le toatele o tamaiti i le avanoa na mafai ai ona mafuta ia Superman.
