E ui o le taaloga muamua a Sonny Bill Williams na tulimatai ma talanoa i ai tagata a o lei amataina le taamilosaga o le 2013, ae na mataina tele foi le taaalo a isi alo o Samoa i le au malosi a le Rabbitohs, Eels faapea Manly.
I le po o le Aso Tofi talu ai na matuā faatumulia le malae o Allianz i le taaloga amata o le 2013 lea na featui ai le Roosters ma Souths. Faatoa alu atu Sonny Bill toe lima minute ta le malologa ae peitai ua sili na o ‘ai o le Rabbittohs e 16-4.
Na atili malosi Souths i le ‘afa mulimuli ina ua toe sikoa George Burgess i lalo o e pou i le minute lona 45 mo ‘ai e 22-4.
O le po lea na sikoa faatolu ai Nathan Merrit mo Souths lea na atoa i ai le 28-4 faatoa sao atu ai loa Sonny Bill i lalo o le pou mai se pasi a Frank Paul Nuuausala mo ‘ai faaiu 28-10. E ui e lei manumalo le au a Sonny Bill ae na fiafia nisi i lana taalo ma le pue i le taimi na sau ai i totonu.
Na ia faailoa i lana talanoaga ma le TV 9 o mea laiti e pei o le atoa o seti, puipuiga o le laina ma le taofi lelei o le polo o loo ia faatāuaina. E lei iai se manu‘aga o Sonny ma ua tepa taulai nei mo le vaiaso fou.
O nisi o alo Samoa na taaalo i le Roosters e iai Frank Paul Nuuausala, Roger Tuivasa Sheck. O le au a Souths na mataina ai foi le taaalo a Ben Te‘o ma Roy Asotasi.
E lua sikoa a Steve Matai na maua i le taaloga a le Manly Sea Eagles ma Brisbane Broncos. Na atagia foi le misia o Frank Pritchard ma Sam Kasiano e le Bulldogs ina ua faia‘ina i le North Queensland Cowboys e 24-12.
O loo manunu‘a Kasiano ma Pritchard e lē mailoa poo afea e malolosi ai, faapea Ben Barba lea o loo faamalolo i le taimi nei e fofo ona faafitauli o le taalo masini poka ma le taumafa ‘ava.
I le Aso Faraile na matuā gapelu ai le Warriors ia Parramatta Eels e 40-10 i le taaloga muamua a Ricky Stuart o le faiaoga a le Eels. O tama Samoa a le Eels e aofia ai Joseph Paulo, K.Sio lea na sikoa faalua ma Reni Maitua. Na sikoa foi Chris Sandow ma Jarryd Hayne i lenei manumalo mataina.
O le manumalo mataina a le Storms e 30-10 a St George Dragons e aofia ai le lua a Justin O’neill, taitasi a Billy Slater ma Mahe Fonua.
I le taaloga a le Sharks ma le Titans na faia i le Aso Sa ua tea i le mae‘a o le tutuli o alii e toafā o le pulega ua tele fesili mai le tausaga talu ai i le faaaogāina o tui faasaina e faaleleia ai le taaalo ma le fitness.
