O fua o galuega lelei a le tina ia Tae i lana fanau ma totonu o lona aiga, o le ata vaaia lea sa iai le tumutumu o le Aso Toonai, 30 o Aukuso i le faleaiga o le Buffet King i Manukau, i ona aiga faapea lana fanau ma fanau o lana fanau.
E ui i le nonofo vava mamao o lona auaiga, ae sa lē tuua ai le fia mafuta mai e patipatia faatasi le alofa o le Atua e ala i nei tausaga e tele ua foai i le tina. O nisi o lana fanau na malaga mai i Ausetalia, o nisi e malaga mai iSamoa, faapea ma i latou o loo nonofo i Masetone sa auai uma mai i le atoaga o le 90 tausaga o le latou tuaa.
Na amata le polokalame i le sauniga lotu na saunia e le susuga i le faafeagaiga ia Atinae Sola mai le Ekalesia a le Auuso Fealofani i Mount Roskill, ona sosoo lea ma le taumafataga.
O se aso fiafia i le fanau ma a latou fanau ona o le tele o tausaga ua aulia e le tina ae o loo vaaia pea le malosi ma le lelei o lona mafaufau i mea uma e talanoa atu ai. O se tasi aoaoga tāua i lenei tina o le faitauina o le Tusi Paia e aunoa ma se faaaogāina o se vaaiga (mata tioata).
O le fofoga o le aso o le tofa ia Tiatia Halefoti faatasi ai ma le fesoasoani a le susuga ia Pele Mapuilesua. O le susuga i le faafeagaiga ia Toomata Sione na saunia le tatalo e faapaia ai le keke, ona usuina foi lea o le pese e faamanuia ai le aso soifua o le tina. O le faletua ia Nele Knowless na saunia le molimau i le soifuaga o le tina auā o ia foi o loo nafa ma le vaaiga ma le tausiaina.
Na taualuga lea aso i faaaloaloga e pei ona masani ai tu ma le aganuu a Samoa, o le tofa lava ia Tiatia Halefoti sa tu tootoo e momoli ni meaalofa teutusi mo susuga i faafeagaiga sa auai, ao le tofa ia Figota Pati sa fai ma sui o le auvalaaulia e talifaitau i le lauga o le aso
Knowless na saunia le molimau i le soifuaga o le tina auā o ia foi o loo nafa ma le vaaiga ma le tausiaina.
