O le tuufaatasiga o matagaluega e lima o le Ekalesia Evagaelia Uesiliana Metotisi Samoa i Aukilani i le Aso Sa ua mavae 15 o Iuni, na faamanatu faatasi ai le aso soifua o le tina ia Alofa Fitu ma le toe faaofi mai o le isi latou matagaluega fou mai Wiri.
O lea ekalesia o loo galulue ai le susuga i le faafeagaiga ia Falealii Kolisi William ma le faletua ia Pesiti Kolisi William. Na faatumulia le hall a le aoga tulagalua a Glenbrae i Glen Innes i sui o ekalesia taitasi sa auai i lenei sauniga paia. O le taitai o le sauniga o le susuga i le Peresetene aoao o le matagaluega ia Paulo Ieriko ma o ia foi o loo tausia le tovine a le Atua i Onehunga. Na mae‘a le sauniga ona sosoo lea ma le taumafataga sa faatinoina lava i le hall a le aoga i Glenbrae.
O le susuga i le failautusi, le faafeagaiga ia Itumalae Lilomaiava sa faafeiloaia le aufaigaluega paia a le Atua faapea le mamalu o ekalesia taitasi sa auai i le taimi o le aiga. Na sosoo ma le feulaina o le keke o le aso soifua o le tina ona lagiina lea o le pese o le aso fanau e faamanuia ai le atoaga o le 55 tausaga ua foai e le Atua i lona soifua.
Ae na ta‘ua e le tina ia Alofa o nei tapenaga uma o lona aso soifua na fuafuaina uma lava e lana fanau. O le tofa ia Sauvao Vaalelea Apulu sa fai ma fofoga o le aso ma o ia foi sa tu tootoo i le faatinoina o faaaloaloga mo le aufaigaluega a le Atua.
cele
