Sauniga Lotu Aso Sa, 29 Me 2011
“Ia outou faia lenei mea ma faamanatuga ia te au”. O le Faamanatuga, o le toe tepa i tua i mea ua tuanai, e faatupu ai faamoemoega mo le lumanai. O nisi o upu taiala a le susuga i le faifeau na saunia le lauga, i le Lotu Faamanatu o le 49 tausaga o le Tutoatasi o le Malo o Samoa, lea na faia i le afiafi o le Aso Sa, 29 Me 2011, i le Ekalesia Faapotopotoga Kerisiano Samoa i Castor Crescent i Porirua.
O le Sauniga lenei na tapenaina e le Mafutaga Faifeau Samoa i Ueligitone. O le taitai o le Sauniga, o le Susuga Popo Su‘a, (Faifeau Toeaina Faatonu, Ekalesia Faapotopotoga Kerisiano Samoa), ma o le Taitaifono o le Mafutaga Faifeau Samoa Ueligitone. O le lauga, na saunia e Rev Popea-Mauigoa (Faifeau o le Ekalesia Perepereane, Stokes Valley).
O le Tatalo o le Faafetai ma le Faatoesega, na saunia e le Susuga Savaii Loto (Sea, Sinoti i Saute Niu Sila, Ekalesia Metotisi Samoa). O le Tatalo o Manaoga, na saunia e le Susuga Tupulua Sekai (Faifeau Ekalesia Faapotopotoga Iesu Samoa). O le Susuga a Malaki Muaiava (Faifeau Toeaina, Ekalesia Faapotopotoga Kerisiano Amerika Samoa), na folafolaina le Tusi Paia.
Na uluai momoli atu le Afioga Paia a le Atua, faatasi ai ma le afifio atu o Sui Tofia o le Sauniga ona momoli atu foi lea o le Tagāvai o le atunuu, ma lagiina ai loa le Vii o le Saolotoga o Samoa.
Ona faagasolo lea o le Sauniga, e pei ona faapolokalameina. “Malietoa ua Malotau, Malo faafetai i le Atua”, o le saunoaga a le Komesina Sili o Samoa i Niu Sila, le afioga i le aoe‘e, Asi Tuiataga James Faafili Blakelock, na fai ai o ia ma fofoga tau momoli o le Ao o le Malo o Samoa, faapea le Palemia ma le Kapeneta, o le Palemene o Samoa, e molimoli ai le agaga faafetai i le Mafutaga Faifeau Samoa Ueligitone, ona o lenei faamoemoe, aemaise foi le mamalu o Samoa na aofia.
Sa faapea foi ona saunoa le afioga a Afamasaga Maugalēoo, o le Fono Faufautua Samoa Ueligitone, e faafetaia ē na tapenaina lenei faamoemoe, auā le faamamaluga o le 49 tausaga o le tutoatasi o Samoa.
A o lei mae‘a le sauniga, na toe saunoa faalaeiau le taitai o le sauniga, le Susuga Popo Su‘a, e saga tapue atili le agaga faatuatua o Samoa i lenei aso na taupoina. Na mae‘a le Sauniga, ona alo lea i le taumafataga, ma taape le toatele o le mamalu o le atunuu sa mafai ona auai i lenei Lotu Faamanatu o le Tutoatasi o Samoa, 2011.
Aso Lulu, 1 Iuni 2011
E matalasi le vaaiga ma le lagona o le tasi felanulanuai o le mafutaga o tagata eseese, na mafai ona auai ma tali atu i le valaaulia a le Komesina Sili o Samoa i Niu Sila, le afioga i le aoe‘e, Asi Tuiataga James Faafili Blakelock ma lona faletua, le afioga a Letelesā Helen Blakelock, e patipatia faatasi le faamanatuina o le 49 tausaga o le Tutoatasi o le Malo o Samoa, na faia i le faletalimalō, o le James Cook i Ueligitone, i le po o le Aso Lulu, aso muamua o Iuni 2011.
O le ta o le 7 na taunuu ai le au valaaulia, e lē gata o Amepasa ma sui o Malo eseese e afifio i Ueligitone, ae faapea le aufaigaluega paia a le Atua, ma le mamalu o Samoa potopoto.
O le afioga i le Konesula o Samoa i Aukilani, Faolotoi Tauiliili Reupena Pogi, na avea ma fofoga o le po, na ia saunoa faafeiloai ai i le aofia, aemaise foi o sui o le Palemene o Niu Sila, e aofia ai le susuga i le faipule, Su‘a William Sio.
O le Susuga Popo Su‘a, Faifeau Toeaina Faatonu o le Ekalesia Fa’apotopotoga Kerisiano Samoa, ma o ia foi o le Taitaifono, o le Mafutaga Faifeau Samoa Ueligitone, sa taitaia le Sauniga Lotu, e taialaina ai le polokalame.
O nisi o tamaitai talavou Porirua na siamupini i aufaipese usu fua i Niu Sila, na lagiina viiga o le Atua. Na saunoa le failauga, ua potopoto faatasi e patipatia le lototele ma le lotonuu o tuaa, pei ona manuia ai Samoa i lona saolotoga, i le aso 1 o Ianuari 1962.
Na mae‘a lea ona saunoa lea o le afioga i le Komesina Sili, Asi Tuiataga James Faafili Blakelock, e tusa ai ma le faamoemoe.
Sa ia saunoa, o le lima tausaga talu ai, sa ia molimauina lenei faamamaluga o le saolotoga o Samoa, pei ona faatinoina faasolosolo i aai eseese o Niu Sila i tausaga taitasi. Na ia ta‘ua le feagaiga ma le sootaga faauō a Samoa ma Niu Sila mai lava i le amataga, lea e oo mai i le taimi nei, o loo faaauauina pea, lea ua manuia ai pea Samoa ona o le aiga fesilafai o malo e lua, pei foi ona iai le tulaga i le atina‘ega o aoga, galuega ma isi alagāmanuia.
O le aufaipese siufofoga mālie a le Mission Choir, na lagiina le Vii o le Saolotoga o Samoa faapea le Vii o le fu‘a a Niu Sila.
O le saunoaga autū o le po, na fofogaina e le tamaitai Minisita o Mataupu tau Atumotu o le Pasefika, le afioga a Georgina Te Heuheu. Na ia ta‘ua foi le sootaga vavalalata a Niu Sila ma Samoa, e lagolago i le tamaoaiga, soifua maloloina, aoga, turisi ma fefaatauaiga.
O loo faaloloto tumau pea le faigauo a malo e lua, lea foi na molimauina, ina ua afatia Samoa i le sunami, na tali atu Niu Sila e ala i fesoasoani tau tupe ma le anoanoai o soo se vaega moomia.
E lei galo foi ia Samoa le alofa sasaa o Niu Sila, ina ua afatia Kalaiesetete i le mafui‘e, ma aao mafola i meaalofa auā le aai o Kalaiesetete. O Samoa, o se auaiga o Niu Sila, e pei ona saunoa le tamaitai Minisita. Na sosoo ai ma faafiafiaga, pei ona tatalaina aloaia i le sausaunoaga a le Mafutaga o le Fono Faufautua a Samoa.
Na valaau faapitoa foi faletua o le aufaigaluega paia a le Atua, aemaise i le aufaigaluega mālōlō manumalo, e faafiafia.
O le susuga i le faletua Fereni Ete, o ia foi o le Taitaifono o le Komiti Faafoe o le Siufofoga o le Laumua, sa saunoa e valaau faapitoa le tamaitai Minisita, i la latou saasaaga faa-Samoa.
O le taualuga o fiafiaga, na saasaa ai le afioga i le faletua o le Komesina Sili, le afioga a Letelesā Helen Blakelock. Na faaiuina i le tatalo na saunoa e le Susuga Popo Su‘a, ma ta‘ape fiafia ai le mamalu o le aofia na potopoto faatasi e patipatia le 49 tausaga o le Saolotoga o Samoa.
