Na potopoto fiafia mātua ma aiga o le susuga ia Okaye Forenzo Bundy Pule i le Aso Lua aso 14/8/2012 sa faataunuuina ai le aso soifua 21 tausaga o Okaye Forenzo Bundy Pule Jorreil Bondy Pule. O le taitai o le sauniga o le Toeaina Taitai o le Ekalesia Aso Fitu o le Toe Afio mai i Logan, susuga ia Lavea Tamala Peni Vaili faatasi ma le fesoasoani a Laifai Faletui Faraimo (Sui Taitai Toeaina). Sa kapeteni e le Tiakono ia Teleiai Vete Senifili le po atoa.
O se po mataina ma le matalasi ina ua faatasia uma ona aiga ma ana uo e le gata i aoga a o le tala lelei. O Okaye na fofoaina lava e mātua o lona tina ia Sauita Magele. Na ta‘ua e le tamā ia Malagamalii ma le tina ia Saunoa Pule, e tolu ni vaega tāua e tatau ona maua e se tamaititi lelei, (1) Alofa, (2) Usitaui, (3) Faaaloalo poo le ava. O mea na e le galo ai le atalii poto, ma e faafetaia ai le Atua ina ua aulia mai le 21 tausaga o lona olaga a o tumau pea nei vaega ia te ia a o tuputupu a‘e.
O Okaye Forenzo Jorreil Pule o ona matuā moni o Foafoanuu Tala & Sauita Magele mai Sinamoga & Samatau, a o mātua na fofoaina lona olaga o Malagamalii Okei & Saunoa Pule mai Samatau.
Alofaaga ma faamanuiaga mai ou mātua ma aiga uma lava i Samoa, NZ, faapea Ausetalia atoa aemaise Ane & Aana Puni & fanau, Tamala Lavea Peni & Mati Vaili aemaise Malagamalii ma le tina ia Saunoa Pule na o la feagai ma le tausiga o oe i aso e tele, uo foi ma e masani.
Ia manuia lou 21 tausaga Bundy, faaopoopo e le Atua nisi aso se tele e te auauna ai ia te Ia.
