Tatou talanoa ia i mataupu tau galuega i lenei vaiaso. Ua faalauiloa mai le faaaliga a le Ofisa o Faamaumauga ua toe siitia le fuainumera o tagata ua leai ni galuega mai le 6.7% sa iai i le faaiuga o Mati 2012, i le 6.8% ua iai nei i le faaiuga o le masina o Iuni 2012. O lona uiga ua atoa nei le 162,000 o le aofai o tagata o lea ua faamau e le Ofisa a le Malo ua lē faigaluega poo ua ‘unemployed’.
Afai e faatusatusa i le 155,000 le aofai o tagata sa leai ni galuega i le masina o Iuni 2011, ua toe faaopoopo le isi 7,000 o le aofai o tagata ua leai ni galuega, i lalo lava o lenei faigamalo.
E talu lava ona tulai mai le National e avea ma faigamalo mai le masina o Tesema 2008 ua toe faaopoopo le isi 57,000 le aofai o tagata ua lē faigaluega poo ‘unemployed’.
O loo atagia mai foi i nei faamaumauga se tasi o itu e faapopoleina ai a‘u ona o lenei. Ua aliali mai foi ua pa‘ū i lalo i le 19,500 le aofai o le fuainumera o galuega tumau poo ‘full-time employment’ ae ua siitia i le 8,900 le aofai o le fuainumera o galuega faavaitaimi poo le ‘part-time work’.
E foliga mai i nei faamaumauga ua tele galuega faavaitaimi (part-time work) ae itiiti le numera o galuega tumau (full-time work).
O lona uiga ua tele le pa‘ū i lalo o le aofai o galuega tumau e mafai ai ona tausi lelei tatou aiga.
Afai o tatou tagata o loo faigaluega i galuega faavaitaimi, e mata e mafai ona tausi ai se aiga i totogi mai nei galuega faavaitaimi?
O loo manino mai foi faamaumauga o le Ofisa o Faamaumauga o le fuainumera o tupulaga talavou i le va o le 15 seia agai i le 24 tausaga le matutua ua siitia nei le aofai o latou ua lē faigaluega i le 12,900 tagata talu ona tulai mai le National e avea ma faigamalo o Niu Sila i le tausaga 2008.
O se tasi foi o lipoti sa faasalalau mai e le Matagaluega o Leipa a le Malo ua faapea mai e ui e tele avanoa faigaluega o loo faasalalau i le internet, ae peitai, o lea o loo maualuga pea le aofai o tagata ua resitala e lē o faigaluega e pei ona iai nei i le 162,000 le aofai o tagata.
E foliga mai, e ui o loo faimalaga pea le toatele o tagata mo galuega i Ausetalia, e ui foi o lea e tele naua le aofai o avanoa faigaluega o loo fasalalau i le internet, ae afai o loo agai pea i luga le aofai o le fuainumera o tagata ua leai ni galuega, o lona uiga e lē o tutusa le agavaa o latou o loo ‘unemployed’ poo fia maua ni galuega ma le tomai o loo manaomia mai e galuega o loo faasalalau.
O i tonu lava e tāua ai le sao o le polokalame aoga o lea e aooga ai tagata o loo fia maua ni galuega. Auā e leai se tāua o le aoga i se mataupu e te lē maua ai lou agavaa mo se galuega. E ao lava ona o tutusa polokalame aoga ma mataupu poo le tomai faapitoa o lea e te aoga ai, ma le tomai poo le faailoga o loo manaomia e le kamupani e ana galuega ia e faasalalau.
Ua atagia foi i le tele o le feeseeseaiga o le fuainumera o tagata ua leai ni galuega ma le fuainumera o avanoa faigaluega o loo faasalalau, le tāua o le aoga, le tāua o le faailoga maualuga, le tāua o le tomai faapitoa e tatau ona maua e alo ma fanau.
Ua manino lelei lava afai e leai se faailoga, leai se tomai faapitoa ua faigata lava ona maua se galuega. O le tulaga pito i sili ona faigata i le toatele o tatou alo ma fanau, ona o lenei lava atunuu, afai e leai sau galuega, ua leai sau meaai.
E matuā manaomia lava se galuega ina ia mafai ona e soifua lelei ai i lenei Atunuu. Afai foi o loo e fia faamoemoe i se fesoasoani mai le Malo, ia o lea ua iai foi suiga ua lē toe faigofie ona maua ai lea fesoasoani, e oo lava i fale. Ua faigata foi ona faamoemoe faapea e fesoasoani mai lou uso poo lou aiga. Afai foi e mafai, e mafai na o sina vaitaimi, ae a umi loa foi o nonofo faatasi, e lagona uma lava le faigata pe afai e toatasi le tagata o la e faigaluega e tausia le toatele.
O la‘u foi fautuaga i nai aiga o loo i Samoa, aua le soona feosofi i le vaalele e fia malaga mai i Niu Sila i lenei vaitaimi o le faigata o le tamaoaiga. Ia muamua lava saili se galuega e totogi lelei. Afai e leai se faailoga, leai se tomai faapitoa, e matuā faigata lava ona maua se galuega. Afai foi e maua se galuega, ae faaletonu le totogi, o le a faapena foi ona faaletonu le tausiga o lou aiga mo le agai i luma.
O lea ou te manatu ai lava, poo le ā le faigata, ae ia unai pea tatou alo ma fanau ina ia taumafai i le aoga, ia aua ne‘i faavaivai. O tatou foi o mātua, e lē tatau foi ona tatou faatamala, e tatau foi ona tatou saili avanoa e toe saili ai se isi tomai fou faapitoa.
O le mea lea e tāua ai ia te au le polokalame a le susuga i le faafeagaiga Rev Victor Pouesi ma le Ekalesia EFKS i Magele i Sasae, o loo galulue soosootauau ma le aoga maualuga o le Otaga University e faia se polokalame o le Homework Centre.
O lea polokalame ina ia fesoasoani i alo ma fanau i latou meaaoga ina ia latou maua le poto ma le atamai. Fai mai se tasi o faiaoga ia te au. E le faapea e popoto atu tamaiti Asia nai lo tatou tamaiti, e leai, e sese lea manatu. O le mea sa‘o e toaga atu tamaiti Asia e fai meaaoga, i lo tatou tamaiti. Afai foi e toaga tatou tamaiti e fai meaaoga, e faapena foi ona lelei latou togi e maua mai suega i aoga.
