E ova atu i le 3 afe tagata o le atu Pasefika e aofia ai ma Samoa sa faapea ona faatumulia ai le Paka i Goodna i le Aso Toonai na sei mavae atu nei, i le faamanatuina o le 150 tausaga o le Pasefika i le itumalo o Ipswich, o se tasi o itumalo o Kuiniselani.
Sa amataina i le sauniga lotu sa taitaia e le failautusi a le ekalesia AOG Samoa le susuga i le faafeagaiga ia Ps Tae‘auga Frost, sa auai ma le faletua ia Saeseese.
Na mamalu lea taeao auā sa faataunuuina ai le ‘ava o feiloaiga na malualii ai le aso, sa faataunuuina lava e le mafutaga a le Tuaa Sinasina Samoa Elders Advisory Council Incorp.
O lē sa avea ma tausala ma paluina le ‘ava o le afioga ia Afegaitinooti Lenamo Natalia Farani Tuimaugapo.
O ia foi sa saasaa i le taualuga ae aiaiuli ai nai tamā matutua ua ta‘i 80 tausaga e pei o le afioga ia Samia. Sa tufaina le ‘ava e Kose Lui.
O Tofilau Leota ma Seve Vaili sa agaia le ‘ava. O le tautū‘ava o Fanueli Lologa.
O le mafutaga a le Tuaa Sinasina Samoa Elders Advisory Council Incorp sa taulamua foi i lea faamoemoe.
Sa ata eseese ma aga mālie faafiafiaga a atumotu faapea pesega malie. O faafiafiaga e aofia ma ē sa fai sao e iai le Ngati Porou Ki Brisbane, Mayor Paul Pisasale sa faafeiloai. Tatalo amata ma le viiga o le Atua sa lagiina e le Uniting Church a Inala.
Aoga Inala State School ia latou faafiafiaga, ausiva a Cook Island Cultural Dance Group, Virginia Wesleyan Tongan Group, Mataniu Musu, St Peters Claver College, Tuaa Sinasina, Mark Lowndes, Te Roopu Manawaroa Maori Culture, Bundamba State Secondary College, Queensland Cook Islands Sports Association, Pan Pacific Oceania Incorp, Voice of Christ Full Gospel Church Inc, ma Geak Squad.
Sa faaiuina i se taumafataga tele ma le felesi auā na faatumulia i faleie o atumotu eseese faapea ē sa faatauina ai foi a latou oloa e pei o laei ma taumafa eseese.
O le Peresitene o le mafutaga a Tuaa Sinasina, o le faletua ia Tautali Tuimaugapo Paese Tautiepa faatasi ai ma le laulauafono, aemaise le paia ma le mamalu o tupu ma tamalii, failauga ma le aufai tofā a le atunuu o loo faamaopoopoina lenei mafutaga ua faaigoaina o le Tuaa Sinasina Samoa Elders Advisory Council Incorp.
E momoli le agaga faafetai i nai nei ao sinasina o Samoa o loo alaala ma papaaao i Brisbane, i le faamaopoopo ma le lagolagoina foi o Samoa i totonu o faalagamaea a atumotu o le Pasefika faapea nisi o mafutaga sa auai ua lē mafai ona maua e a tatou lipoti.
