Faamanatu 15 tausaga o le Mataaga i Vailima

E te ulufale atu loa i faitotoa tetele o le Lotoa lea e siomia ai le nofoaga sa faamautu ai le Tusitala lauiloa o Ropati Lui Sitivenisone, lea foi na fai ma maota o le Ao o le Malo le susuga Malietoa Tanumafili II, e pei e tapuni atoa mai suiga o Samoa i fafo atu o lea lotoa, ae faafeiloai mai oe e laau o loo ua toto atoa atu i itu e lua o le auala e agai atu ai i le Maota i Vailima.
O le vaapiapi o le auala e agai atu i lea maota tele e gata loa e vaaia le fanua tele ua taatia ai le Mataaga o Ropati Lui Sitivenisone lea ua 15 tausaga talu ona faavae.
O ni alii faipisinisi o le Ekalesia a Iesu Keriso o le Au Paia o Aso e Gata Ai, na lāgā le manaoga e avea lenei nofoaga ma Mataaga, ma o se galuega tele na mulimuli mai ai ina ua faamaonia e le Malo le toe fausia atoa o lenei maota tele i foliga sa iai ina ua faatoa fausia ae nofo ai le alii tusitala mai Sikotilani ma lona aiga, ina ua manatu o Samoa ua maua ai sana malologa mai aafiaga i le gasegase o le fatafata vaivai.
O potu uma o le fale na toe fausia mai i ata sa maua e nei alii Amerika ma na ao mai i Amerika ma Peretania nisi o meaafale sa iai i le vaitaimi o le Tusitala e toe teu ai lenei Mataaga.
O loo faaauau lava la le maua o meaafale, meateufale aemaise o lavalava e manatu i laua nei na faaaoga i lea vaitaimi a o soifua ai le Tusitala ma lona aiga i lenei nofoaga.
O se fiafia na faatautaia i le Mataaga na faamanatu ai le 15 o tausaga o lenei mataaga ma o se nofoaga ua molimauina le toatele o tagata tafafao mai ua afea talu ona amata tatala i le lautele lenei nofoaga mo asiasiga.
Na auai mai i laua na faatuina lenei nofoaga, o Tilafaiga Rex Maughaun, o ia o le Taitaifono o le RLS Foundation, faapea le Peresitene o le Mataaga o Ropati Lui Sitivenisone, le susuga Jim Winegar.
O ia alii faapea ai le Pule o le Mataaga o Afamatautia Talapusi, na talimalo ai ia i latou na valaaulia mo lenei po fiafia.
O se sauniga foi na ave ai se faaaloalo ia Vaasiliifiti Moelagi Jackson, o se tina ua tele tausaga o finau i le faalauiloa ai o Samoa i le atinae o tagata tafafao maimoa mai i fafo ma ana taumafaiga e faalauiloa puipuiga o le siosiomaga i le atunuu.
O se faafiafiaga mai i le alo o le alii faipule o Hans Joachim Keil, o Nathan Keil ma le alo tamaitai o le Peresitene o le Mataaga o Jim Winegar, le tamaitai o Becca Winegar na aofia ai i faafiafiaga o le po.
O i laua nei e maua i le down syndrome ae na manino le maualuga o le tulaga o iai le taleni i faafiafiaga.
O nisi o valaaulia o lenei po fiafia o tamaitai na tauva i le sailiga o le Tausala o Samoa, o le Malo atoa ai le mamalu lautele o le atunuu i totonu o le atinae o tagata tafafao maimoa mai fafo.
O suiga ua molimauina i lenei mataaga na faamatala i se tusi na saunia e le Peresitene o le Mataaga ma na faatuatusi i le Tusitala.
O le faatinoga o lea tusi na taua e Jim Winegar, na ia faia ona o le Tusitala ua lauiloa e le gata i tusi faitau na ia tusia a o tusitusiga na ia faia a o iai i Samoa mo aiga ma uo i Peretania i ia vaitau.
E pei lava ona silafia o le Tusitala o loo lagomau i le tumutumu o le Mauga o Vaea, le nofoaga na molimoli i ai e tagatanuu o Samoa lona tino maliu.
O se alii na avea ma uo a tagata Samoa ma o se tusitala na malaga mamao mai lava ona o le sailia o se mapusaga i le feagai ai ma gasegase o le tino.
O le mataaga na faaaoga foi i le vaiaso na tea nei auā le tele o potopotoga i le sailiga o se Tausala o Samoa.