Ua sauni atu Samoa i le taeao a taeao (Aso Gafua taimi Samoa) mo le suiga o le ituauala o le a feoai ai taavale, ae o loo faaauau mai lava tetee.
O lea ua maea talosaga le Alii Palemia i le Itu o loo Tetee i le suiga o le Ituauala le PASS ina ia tutu faatasi e unai suiga nei e ala i le faalauiloa o suiga ua faataatitia.
Ua talosaga foi le alii Palemia i pulega a afioaga eseese ina ia alolofa e puipui meatotino e pei o pou ua faatutu ai faailoilo ma faatonuga eseese o le faafoega o taavale i luga o alatetele.
Ua faaleaga ma talepe e nisi ia faailoilo, ua toe tusitusi uma nisi vaega o le alatele ona o le le fiafia lava o nisi i lenei suiga tele ua faatautaia.
Ua maea foi le faaiuga a le Faamasinoga Maualuga ua faaalia ai e le soli faavae le suiga a le Malo ae mo le agai i luma e taua lava le tapa o se finagalo o tagata uma o le atunuu.
Faaauau ona tetee Sakalafai
Ua maea ona toe suia le tetee na faalauiloa i le lua vaiaso talu ai a Salelologa, ae o lea ua tulai mai le pitonuu o loo aofia i ona eleele le uafu i Salelologa ma vaega o le taulaga i lea itu o Savaii, o Sakalafai ma faapea mai e lei iai i lea ioega mulimuli ma e faaauau le latou taofia o le feoai o taavale i alatele o le Malo ia e i totonu o le latou pitonuu i le aso a taeao pe a amata suiga.
Sa faaalia e Pauli Apelu o le a ati pa maa e taofi ai feoaiga a taavale sei vagana lava ua oo atu le Malo.
E lei iai se tali aloaia a le Malo i lenei tusi.
Ua iai se isi tagi i le faamasinoga
O le isi faalapotopotoga ua toe tuu atu se latou talosaga i le Faamasinoga Maualuga i lenei mataupu, o se faalapotopotoga ua taua i le faapuupuu o le TUMAS – o se vaega ua o latou ave le faataua i pulega o Samoa i le faamatai. O loo taitaia e le Afioga Le Tagaloa Pita.
O le finauga a lenei faalapotopotoga lea foi ua faalauiloa, ina ia taofi le suiga atoa o le suiga o le ituauala e pei ona unaia e le Malo sei vagana ua maea ona sainilima mai le silia i le 40 pasene o matai o Samoa.
O loo ua taatia nei i le Faamasinoga lea talosaga. O le manatu o le TUMAS o le pulea ma le taitaiga o Samoa e sau i matai o le atunuu ma o i latou nei e lei tapa so latou finagalo i le suiga a le Malo ae o i latou ia ua toe talosagaina e faamamalu suiga fou o le ituauala e feoai ai taavale ma puipui meatotino a le Malo ia ua faaleaga e nisi o afioaga.
Tetee a le au faipasi
O le faalapotopotoga o le au faipasi ua oo atu foi se isi tusi i le Minisita o Felauaiga i luga o le Elelele, le Afioga Tuisugaletaua Sofara Aveau.
O le tusi lea ua o latou teena ai le ofo a le Malo mo le laisene fua o pasi i le tausaga atoa sei fesoasoani ai i suiga o le itu e tatau ona iai le foeuli ma le faitotoa o pasese a pasi laupapa.
O se tuutuuga lea mo suiga nei a le Malo, lea e tatau ona vaaia e amata atu i lenei vaiaso na o pasi laupapa ua maea ona toe sui le itu e faatu ai le faitotoa e ulufale ma ulufafo ai pasese ma le itu e iai le avepasi ma le foeuli o le pasi.
O le maliega a le au faipasi e tusa pe tutu pasi e le toe feoai ae e tatau i le Malo ona fesoasoani atu e ala i tupe e faatino ai suiga ua faatonuina le aufaipasi e faatino.
O se faamatalaga a le fai pasi mai i Manono na tapa sona finagalo i lenei mataupu, o le afioga Nanai Taiwan, ua tu le pasi e tasi ua maea ona ia suia ona o le fefe i gau le pito i luma o le pasi.
“Ua uma nei ona tipi le itu fou o le a iai le faitotoa ma sui le itu e iai le foeuli o le pasi, ae ua maluelue le pasi pe a fealuai, e iu na gau le pito i luma, ma e le toe fealuai aua e tatau foi ona toe sui le itu e iai le tane suauu aua e oia i le faitotoa fou lea ua uma ona faatu.
O le pusa atoa o le pasi e tatau ona sui ae ua leai ni tupe e fai ai suiga ia e manao i ai le Malo,” o se finagalo lea o Nanai Taiwan.
“A vaai atu i ai e tusa lava ma le $50,000 (tala Samoa) le tupe e faaalu i le toe fausia atoa o le tino o le pasi ona o nei suiga, ae e leai nisi e iai ni $50,000 e faatino ai ia suiga, o le mea lava lena ua tapa ai se finagalo o le Minisita i lenei mataupu”.
Faaalia foi e Le Anapapa Laki, le sui sooupu o lenei faalapotopotoga e le talia e faipasi le ofo lea a le Malo e laisene fua ai mo le tausaga atoa a latou taavale lau pasese ae ia faatino suiga ua tuuina mai.
Ua tālia foi la se isi tali mai a le afioga i le Minisita i le talosaga a le au fai pasi.
O le popolega lava o le toatele o le atunuu o le le feoai o pasi nei e amata atu i lenei vaiaso, o lona uiga ua faigata foi feoaiga a le mamalu o le atunuu i galuega aemaise aoga a fanau.
O le faafitauli tele lava e mo afioaga i tua e le o maua taavale e usuai mai ai i galuega i le talafatai o Apia.
Tulaga o iai le taimi nei
O loo faataga lava taavale lau pasese laiti e tu i le agavale foeuli ona feoai, o le tulaga foi lena i pasi faamalu ia e aumai i fafo, o loo mafai lava ona feoai seiloga ua le mafai ona toe lau pasese ona faasa loa lea i luga o alatetele.
O le malaevaalele foi lea ua fesuiai itu e feoai ai taavale ina ia mafai ai ona faatino suiga ia ua manaomia i le alatale.
O loo faagasolo lava foi aoaoga i luga o polokalame a Televise i le atunuu mo le silafia atili e le atunuu o suiga ia ua faatautaia i le taimi nei. Mo le au faipasi, o loo moomia se tali a le Malo i le latou talosaga, a leai o le toatele ia ua faalauiloa mai le le toe feoai o a latou taavale lau pasese.
O le ta o le ono (6am) i le taeao a taeao e aloaia ai loa le suiga lenei o le ituauala e feoai ai taavale, i le maea ai o se sauniga lotu e talosia ai lenei taumafaiga tele a Samoa. E faia lea sauniga lotu i luma maota o le Malo i le Eleele-fou.
