O le Aso Sa na tea nei, aso 29 o Aperila, na amata faamamalu ai siitaga fou o pasese ma totogi o femalagaiga a tagata lautele i luga o vaa, pasi ma nofoaafi i totonu o Aukilani.
O lea siitaga fou o loo ta‘ua i se pepa o faamatalaga sa faamatuu mai e le Matagaluega o Felauaiga i le Laueleele a Aukilani, o se fuafuaga ua tatau ma ua talafeagai mo le taimi nei ina ua mae‘a ona faia se iloiloga faaletausaga o lea mataupu.
O le siitaga fou o pasese sa fuafua ma faatatau i tupe faaalu i le tau o penisini, o totogi o le aufaigaluega, ina ua saoasaoa ma televave tele le tau o le penisini ma isi tupe faaalu. E talitonu ai i latou sa iloiloina lea mataupu, ua talafeagai le faia o se siitaga mo le taimi nei, ina ia faapaleni ma faafetaui ai tupe faaalu o loo faagaioia ai auaunaga i le felauaiga o tagata lautele i pasi, vaa ma nofoaafi.
O le saunoaga a le alii pule o Taavaleafi ma Felauaiga i le vaega o auaunaga mo tagata lautele i Aukilani, Mark Lambert, sa ia ta‘ua ai e faapea, o siitaga e lei fuafuaina, ma e lei faia foi i taimi uma sa siitia ai le tau o penisini, o le tele lava o taimi sa tumau pea mo se vaitaimi umi, ona sa vaavaai ma silasila totoa mo se taimi tonu e tatau ai ona faiga lea gaioiga.
Ae o le tausaga nei sa faamaonia ai siitaga, ma faailoa ai loa ma le aso e faamamaluina ai e pei ona ta‘ua i luga.
E amata mai i le 10 sene i le 90 sene, ua toe faaopoopo atu nei i pasese tuai sa iai, aemaise lava nofoaafi.
Ua na o se vaega o pasi, ma vaa o le sami o loo aafia i le siitaga, ae o le tele lava o loo faatumauina pea, sei vagana ai nofoaafi ua suia atoatoa ona tau.
Sa toe faamanatu e Mark e faapea, ua tele tausaga ua tuanai sa fiafia pea tagata femalagai i nofoaafi, ona o le taugofie o pasese e totogi nai lo i latou e faaaogaina pasi. O le taimi nei ua oo atu i le 2000 malaga a nofoaafi i le vaiaso, ma ua faatoateleina pea i latou e faaaogaina, e aofia ai ma se tasi o auaunaga fou mo le taimi muamua, ua agai ma taunuu i Manukau.
O le faaiuga o le saunoaga a le alii Pule, sa ia ta‘ua ai, e ui i le siitaga fou o pasese ua faia nei, peitai o loo taugofie pea, pe a fuafua i siitaga ma le taugata o le tau o le penisini e pei ona iai.
O se tasi lea o auaunaga e le mafai ona aveesea mo tagata lautele, poo le a lava le taugata ma le faigata o le agai mai o le soifuaga, ae faaauau pea ona faia lana tautua mo tagata lautele o le atunuu.
