O le agaga lagolago ma le faaeaea o le isi Samoa i le isi Samoa, ona o le soifua tauivi, ma le sailimalo, o le autu lea na taulai i ai se talanoaga ma nisi o tamalii iloga o le atunuu i le tulaga o galuega ma pisinisi.
O le finagalo moni foi lea sa le talitualimaina ai le valaaulia faapitoa, i le tatalaina o le Ofisa autu o le uluai Faipule Samoa ma le Pasefika i le vaega faaupufai a le NZ First.
O le lona lua ai lenei o vaiaso talu ona mae‘a faataunuuina le tatalaina aloaia o le ofisa fou o Leaufaamulia Asenati Lole-Taylor, i le taulaga i Papatoetoe. O Asenati o le Sui Faipule sa tamoe mo le Itumalo i Manukau East i le faigapalota a Niu Sila, ia Novema o le tausaga na tea nei. E ui ina e lei manuia i le nofoia o le nofoa faaitumalo, peitai sa faamanuiaina i se tasi o nofoa i le Lisi a le vaega faaupufai a Vaovasamanaia Winston Peters, le NZ First.
Ae o le aso o lona faamoemoe sa tatala ai lona ofisa, sa maua ai ma se feiloaiga ma nisi o tamalii o le atunuu. O ni tamalii sa iloga ma o loo ave pea i ai le faatuatuaga o tagata lautele i galuega lelei ma le aloaia e pei ona tofia ma galulue ai. Sa matagofie le faasoa, ma faatauaina foi so la finagalo, e tapue ma saga lagolago ai le tulai mai o Leau o se Sui Faipule i le Palemene a Niu Sila. Ae sa laua lagolago malosi foi i le taua ma le tatau ona iai se ofisa e ogatotonu i ai galuega a le tamaitai Faipule.
O le Afioga i le Alii Faamasino Enoka Puni, ma le Afioga i le Tauaana, o le Faufautua mo le Aai Malosi i Aukilani, le Auckland Super City, Anae Arthur Anae. Sa ta‘ua e ia tamalii le tulaga solosolo i luma ma le televave o le laalaa pea o le finau a tagata Samoa, ma isi atunuu o le Pasefika i galuega ma soo se tiute e oo lava foi i taaloga i totonu o Niu Sila.
I totonu o le Palemene, o uluai Faipule Pasefika lava na ausia lea tulaga, o Samoa. O le Afioga Anae Arthur Anae, ma le Afioga Taito Philip Field, sa mua i malae o la sa i totonu o le Palemene a Niu Sila. O Anae o le uluai Pasefika na ofi i totonu o le vaega faaupufai a le National.
O lea foi ua tulai mai Leau, e le gata o se uluai Faipule Tamaitai, ae o se Pasefika muamua foi ua tulai mai o se Sui Faipule o le NZ First.
