O le Eseta poo le Aso Maliu ma le Toetu o le Faaola, o le vaiaso pito i taua lea i le kalena a le talaaga faa-Kerisiano, ona o loo faatauaina ai le galuega maeaea na faia e Iesu Keriso le faaao o le Ekalesia, mo le lalolagi.
Na faatauaina e le Ekalesia Penetekoso Samoa atoatoa o le talalelei i Austalia le Eseta o lenei tausaga, e ala i le faia tonu ai o la latou koneferenisi lona 4, talu ona tau aofia i Ausetalia, na faataunuuina i Melepone, lea o loo iai lala e lua faatasi ai ma le lala autu mai Perisipeni, o loo tausia e le taitai o Ausetalia le susuga i le faafeagaiga ia Leivi ma le faletua ia Te‘a Mulitauaopele.
O le aao tusitusi o le susuga i le faafeagaiga o i Melepone, Uiga ma le faletua ia Lusila Uiga, a o le vasega o autalavou o loo i lalo o le vaaiga a le faafeagaiga ia Jeph ma le faletua ia Tino Filipaina, o loo tausi Ekalesia foi i Melepone.
Na tatala aloaia le faatasiga i le Aso Tofi aso 5 o Aperila, a o le Aso Toonai o le aso tele lea sa fai ai polokalame a le tupulaga talavou, ma tapunia aloaia ai i le Aso Sa i le sauniga tuufaatasi.
O le agaga maualuga i le taitai ma susuga i faafeagaiga, ia faatauaina e le tupulaga le Aso Maliu ma le Eseta e ala i le tutu ma galulue faatasi i totonu o le Ekalesia.
Ua toe maua se isi malosiaga fou, ona o lenei faatasiga, e le gata i lea, ua atili matagofie ai ala o le tupulaga aemaise o le Ekalesia, o ē e alolofa i le Atua, ma faia lona finagalo. Ia manuia le ESETA.
