O fea lava se tafa o le lalolagi o alaala ma papaaao ai soo se Samoa, e mautinoa ua taulai uma la tatou silasila ma le vaai i le faailogaina o le 50 tausaga o lo tatou malo tutoatasi ia Iuni.
Ae mo le tupulaga talavou a le Ekalesia Katoliko, o la latou vaiaso faapitoa o le a faia i Samoa ia Iulai, le tasi o mafuaaga o loo galulue malosi agai i ai ma ua fai ma tulimataiga i le toatele o i latou.
Aemaise lava i le taimi nei, ina ua mautinoa maumaututu le masii ai o le malaga mo lea faamoemoe, ina ua mae‘a le sailiga seleni sa alo atu i ai le puleaga i le Aso Toonai aso 31 o Mati. Sa faaee ma faataatia le finagalo, ae tuu atu le faatuatua i le Atua e fesoasoani mai i le itu tau seleni. Peitai ina ua faatinoina le tusigaigoa ma maua ai le silia ma le tolusefulu afe tala $30,000, ua amata faigofie ai ona fuafua le faamoemoe.
Na faataunuu uma lava tu ma aga e masani ai Samoa mo aso faapenei, na amata i le sauniga na taitaia e le afioga Patele Paletasala Leota o le taitai o le puleaga, ona faasolo ai lea o faaaloaloga masani.
O le laulau lava a le Puleaga na faafoeina le aso, e pei ona tala ai le toga paia e molimoli ai le agaga faafetai e tusa ma le seleni paia na mafola i ai le aao foai o Samoa, na afifio atu e lagolagoina le valaau faaaloalo a le puleaga.
Na maualuga le viiga o le Atua ona o le lagolago a Samoa ma isi Ekalesia na auai, sa faamalieina le valaaulia i faaaloaloga a le Puleaga.
