Ua toe faamalosia nei galuega faalauiloa ma togafitiga o le gasegase o le Fatafata Vaivai poo le tuberculosis (TB) lea ua silafia ai e le atunuu.
O se faama‘i lenei ua leva ona tatau ona tafiesea ma le lalolagi ae o faamaumauga a le Faalapotopotoga o le Soifua Maloloina a le Lalolagi le WHO e tusa ma le to‘a 3 miliona le aofai o tagata o le lalolagi o loo feoai lava ma feaveai lenei gasegase. O le mafuaaga tele o le tuai na tafiesea
mai i le lalolagi ona o le malosi o le taumafa tapaa poo le ulaula.
O Samoa na faaalia ai o le tausaga e 2000 agai mai i le taimi nei lea ua toe maua ai auga o le ma‘i lenei i Samoa, ma o le popolega tele lava ona o le toatele e lē o siaki ma o le toatele foi o loo maua ai e ono pipisi atu ai le faama‘i lenei i le toatele o le atunuu.
O le fatafata vaivai e aofia ai le tale faalausosoo ma o le popolega ona o le fanau lava ua aafia ai mai i le ulaula o le tagata matua i autafa o le fanau ma le tale atu o loo iai tamaiti.
O le vaiaso la na tea nei lea na taloina ai loa se fonotaga a sui o le Soifua Maloloina ma sui o nuu ma afioaga o le atunuu ina ia saga faamalamalama i ai auga o le ma‘i ma le galuega e tatau ona faatino e soo se tasi pe a masalomia se tasi o le aiga ua maua ai.
O le vaai lava o le fomai le fofo aupito i faigofie o le fautuaga lea ua aumai e i latou o loo i le soifua maloloina auā a tuai foi ona foia o le a telē le galuega e toe faatino auā le togafitia lelei o le tagata ua aafia aemaise o le puipuiga mo aiga aemaise le fanau laiti.
Na amata ona toe maua Samoa i le gasegase i le tausaga e 2000 ma na maua ai e to‘a 25 ua maua ai ma e lē iloa i le taimi lenei poo ua siisii le numera talu mai lea taimi se‘i vaganā ai le pa‘ū teisi ua maua ia i latou lava ua agai atu i le falemai ae o le popolega ona o le toatele e lē o agai mo siaki lea la ua amata ai foi faasalalauga mo le atunuu o loo molimauina le lē to‘a o le tale ma ua umi tele le taimi e maua ai ina ia agai atu i le falemai mo siaki.
O Papua Niu Kini lea ua ta‘ua le toe pepesi faaafi o lenei faama‘i ma ua maliliu ai foi tagata o lea atunuu.
