O le Aso Lulu o le vaiaso nei ua faatonuina ai e le afioga i le Faamasino Sili le Afioga Patu Tiavaasue Falefatu Sapolu le itu a Leoleo, e fofogaina ai molimau e saili ai le moni o le faamatalaga a le tamaitai ia Vaioleti Stowers ua faasāsā solo lona taumafai e saili sana loia.
O le Aso Gafua lea na tolopo mai i ai le mataupu faasaga i le tamaitai ia Vaioleti Stowers ma se alii papalagi ia Grant Holland i moliaga o le gaoi.
Sa poloaia e le Faamasinoga e tatau ona oo mai i le Aso Gafua ua auai atu i laua ia ma ni a la loia. O i laua nei ua tuua‘ia i le faatauina o ni taavale totogi aso (rental cars) mai i ni faletaavale se lua i le talafatai o Apia ma ua faapea ona toe faatau atu i nisi o tagata.
Ina ua fesiligia le tamaitai ia Vaioleti Stowers i lana loia ae tali Vaioleti, talu ona mae‘a atu le valaauga mulimuli o lana mataupu talu ai nei, na fiu e talosaga atu i leoleo i Tafaigata mo se telefoni a o se lisi foi o loia e valaau mai i ai mo se tasi e tulai mo ia, ua matuā tapu lava.
O se faamatalaga na faateia ai le alii Faamasino sili Patu Tiavaasue Falefatu Sapolu ma fesiligia ai le itu a leoleo ona o lenei tulaga. Na ia ta‘ua o se tasi lea o itu o loo faamamafa i taimi uma i le tele o tausaga, o le aiā tatau lea a le tagata o loo aafia e saili ai sana loia e tulai mo ia.
O le faamatalaga a le alii faamasino sili, o se itu ogaoga tele lenei mau ua fofogaina e le tamaitai ia Stowers pe afai e moni. O lea la ua faatonu ai e le Faamasinoga le itu o leoleo o le a valaau lenei mataupu i le Aso Lulu o le vaiaso nei, e aumai ai leoleo o loo i Tafaigata e tali pe moni le faamatalaga ua tuu mai e le tamaitai ia Vaioleti, ma o le a toe sau ai ma Vaioleti i lea faamasinoga.
Ta‘ua e Patu afai o le gaioiga lea ua faia e le itu a leoleo, o le a ia tatala loa i tua tagata uma o loo faanofo vaavaia e tusa lava poo le ā le moliaga o loo molia ai. Mo le alii ia Grant Holland na fesiligia e le alii Faamasino Sili po ua maua sana loia, tali Holland ua teena e le alii loia sa ia faafesootaia e tulai mo ia lana talosaga e tulai mo ia i luma o le faamasinoga.
Poloaia e le alii faamasino sili le alii o Grant Holland ina ia sailia se loia e tulai mo ia, ia aulia atu le aso 13 o le masina nei ua maua sana loia, ma faatoa tuu mai ai foi ma sana tali i le faamasinoga.
