Ua faamalosia pea lapataiga mo nofoaga maualalalo mai lologa oso faafuasei ona o le faaauau ai o timuga i Samoa.
O se tulaga na ta‘ua e le Ofisa o le Vaaitau e umi se taimi o le a molimauina ai ona o loo iai Samoa i le vaitau o timuga ma afa.
E femoumouai lava uiga o le tau ae talu mai le amataga o le tausaga fou lenei, ua manino le malosi o timuga ua palasi i Samoa aemaise i le motu o Upolu.
Faaalia e le susuga Mulipola Ausetalia Titimaea, le Ofisa Sili Lagolago o le Vaaitau i Mulinuu, o se vaitau ua masani ai le timuga ae o loo matauina pea ona o le tetele o le timu palasi.
Ua amata foi ona vaaia le tele o le suavai to‘a i nofoaga maualalalo o le atunuu. O le talafatai o le taulaga i Taufusi ma ua aga‘i ane i luma i Matafele, ua tele le vaivai to‘a.
O le tausaga na tea nei lea sa faamautu ai le faagasologa o galuega ua faia e le Matagaluega o Galuega a le Malo, ona o le taumafai e ta‘i alavai mai nofoaga o le taulaga aga‘i i Sogi lea e alu i ai le suavai lafoai.
O le autū o lenei galuega tele ina ia iai se nofoaga saogalemu mo le aga‘i i ai o le suavai lea sa masani ona alu sa‘o i le sami, ma le taumafai ai e maua se nofoaga e agai i ai le suavai to‘a lea e vaaia i soo se vaitaimi o timuga.
Peitai e pei ona matauina ua tele galuega ina ia faaleleia le solo a le suavai lafoai ma le timu palasi, ae o loo foliga mai ua faatuputupulaia ai le to‘a o le suavai i le lotolotoi lava ia o le taulaga.
O loo faaauau foi galuega o le fausia o kamupani ma fale i ia vaega o le taulaga o Apia, ae e pei ua taofiofi ai loa ma nofoaga sa masani ona alu i ai le suavai.
E tusa ma le lua tausaga talu ai na laga ai e le Vaaitau i Mulinuu atugaluga i le alu a‘e pea o le suavai i taimi o timuga ma lolovaia ai Apia, ma na ta‘ua ai e le faauluuluga o suesuega faasaienisi a le Ofisa, le Afioga Sala Sagato Ah Leong, o le tele o fale ua fausia i le itu lea o le Maketi Fou i Fugalei na tanu ai ma le tele o alavai sa alu ai le suavai i lea nofoaga.
O le tausaga la na tea nei lea na faatautaia ai loa galuega ina ia iai alavai e aga‘i sa‘o lava i Sogi ae foliga mai e tele se isi galuega e faatino ona mafai lea ona faaitiitia le suavai to‘a. O le isi lava tulaga o le maualalo o nofoaga nei e pei foi ona vaaia i le aga‘i mai i Moataa i togatogo, e faigata tele ona tuu itiitia ai vaaiga nei o le lepa o le vaivai i taimi o timuga.
O le faamatalaga a le Susuga Mulipola e ono faaauau le timuga o Samoa seia aulia Aperila ma o loo maua lava sina masele ae e tele ina lē atoa se aso o le la ae maligi loa timuga.
Ona pau le tulaga o loo faafetaia i le taimi lenei, o le leai o se lipoti lata mai o ni afa e ono afea Samoa i le taimi lenei, ae e lē o mālōlō foi lapataiga ua amata ona faalauiloa i le nofo sauniuni pea o le atunuu mo ni faalavelave faalenatura.
O le faaaliga a le Alii Ofisa Sili Lagolago o Mulipola Ausetalia, o i latou o loo nonofo latalata i vaitafe ma ala laupapa faapea ala sima, ina ia nofo sauniuni foi auā o loo tumau lapataiga o lologa oso faafuasei ona o le tulaga mamafa o timuga ma le malosi o tafega o vaitafe ua vaaia i lenei vaitaimi. O le faamoemoe ina ia amata lenei vaiaso ua tau fai ifo faiga a le timu – ua faapea foi ona iai ma lapataiga i le atunuu i le faapupuna o le suavai ma le faatali o vaitimu auā ua palapalā foi le tele o le suavai ua maua i maota ma laoa i lenei vaitaimi.
