E lei manumalo le finau a sui faavae o le Tautua Samoa e na o latou e filifilia le taitai o le vaega faaupufai e tusa ai ma le faavae o le pati.
Na finau lē sa avea ma Peresitene, susuga Papalii Tavita Moala, o latou na tigaina i le tau asaina o le vaega faaupufai i lona amataga.
Peitai o se tasi o faipule sa lagolago i le faavaeina o le Tautua Samoa ae sa tumau pea ona avea ma faipule tutoatasi le tofa Levaopolo Talatonu, sa finau e tatala le filifiliga o se taitai i sui uma e aofia ai sui o isi pati laiti ua lagolago atu i le Tautua Samoa.
Na faapea le toatele o le feteenaiga na aliali i le sailia o se taitai o le Tautua Samoa o le a malepe ma salalautasi ai le maopoopoga o le faafaletui a o loma le palota tele ia Mati 2011.
Pe a fua i le tele o lipoti na salalau ma ta‘ua ai le tasi o le filifiliga i le afioga i le Aloalii ia Vaai Papu, sa tumau lava ona teena e se tasi o sui faavae o le Tautua Samoa le tofa Lealailepule Rimoni ia lipoti ma faamatalaga salalau i lana mau e lei sailia se taitai.
Ae ina ua feiloai sui uma mo le faia o le filifiliga na molimauina le fulisia o le silia i le lima sefulu o sui na auai i le afioga i le Aloalii na te faatautaia le taitaiga o le vaega faaupufai mo le faigapalota ia Mati, ae sui taitai le afioga Palusalue Faapo II.
Ua iai faamatalaga salatua mai nisi o sui faavae o le pati ua faailoa mai ai e lē o logo lelei i nisi o sui o le Tautua Samoa le faaiuga ua oo i ai le sailiga o se taitai. Ua faamanino mai e le taitai filifilia, o laua ma le sui taitai ua na o le faigapalota o loo alo i ai le atunuu o le a la tauaveina ai ia tofiga, ae a mae‘a le palota ona toe filifilia lea o ia tofiga e sui o le a manumalo mai i tofi faipule o le Palemene.
O Vaai Papu o le faipule o Vaisigano Numera Tasi ma o lona tuaa le afioga Vaai Kolone o le uluai taitai filifilia o le HRPP ina ua faato‘ā faatu lea vaega faaupufai. Sa filifilia foi lona tuaa e avea ma Palemia, sosoo ai ma le filifilia e avea ma sui o le Fono a Sui Tofia poo le Sui Ao.
Faaalia e se tasi o sui tauva o le Tautua Samoa le tofa Tafaese Sala Vaimili Uili II, o se mitamitaga i le latou mafutaga o le Tumuai Tutusa le avea o le afioga Vaai Papu ma taitai ona o se tamalii ua loa foi tausaga o lotolotoi i upufai o Malo, ae lē gata i lea o se sui faipule mai Puleono i Salafai.
O le naunautaiga lea sa iai i le toatele o sui o pati laiti, ia filifilia se faipule mai Salafai e taitaia le Tautua Samoa.
