E fegasoloai lava le aufaigaluega a le Atua i faiga malologa, o asiasiga i aiga po o le mafuta mai foi ona o ni faamoemoe o aiga, ona maua ai lea ma ni avanoa lelei ma tāua e tulai ai ma folafola atu le Tala Lelei e ala i le finagalo alofa o le Atua soifua i totonu o soo se fata faitaulaga.
O le Aso Sa na se‘i mavae atu nei na maua ai le avanoa na taitaia ai e le susuga i le faifeau mai Melepone (Melbourn) i Ausetalia le Susuga ia Moe Tauti le sauniga i le malumalu a le aulotu EFKS i Weymouth na ia saunia ai ma faamatalaina ai se tala mo le fanau aoga Aso Sa.
Na matuā faatinoina lava e le faifeau le tala ma faaaogāina ai le fanau e tau faamalamalama atiliina ai le tāua o le uiga o le tala mo le faafaigofie ona manino i le faalogo a le fanau. Na mae‘a ona faamatalaina ma faatinoina o le tala ona saunoa lea o Moe, o se taimi muamua lava lenei ua na vaaia ai ma iloa ai le toatele o tamaiti ua latou filifilia le itu sa‘o e o i ai e tusa ma le fesili na lu‘iina ai tamaiti poo le ā lo latou malamalama o i ai e tusa ma le faamuamuaina ma le faatāuaina o le saogalemu i taimi o se faalavelave e ono afaina ai le ola.
E fai foi lea ma mitamitaga auā o loo ta‘u atu ai le lelei o le faalogo ma le faaaogāina o le mafaufau o faavasega ai auala e mafai ai ona foia o faafitauli o le ola e le fanau. Na faapena foi ona matagofie i le faafofoga a le faalapotopotoga lotu le aumaiga o le feau a le Atua na ala mai i lana auauna.
Na mae‘a le sauniga masani ona mafuta foi lea o le susuga Rev. Moe ma lona faletua ma le aulotu i le latou toonai masani ma saga maua ai pea le mafutaga mafana i lea aso.
