Ua faaulufale nei se tagi, poo se su a le aiga o le alii Niu Sila, o Hans Dalton e faasaga i le malo o Samoa. O le alii Niu Sila o Hans Dalton, sa maliu i le falepuipui i Tafaigata, i lea aso o le kerisimasi o le 2012. O Dalton o lona tamā o le alii Niu Sila, a o lona tina o se tamaiati Samoa. Na maua le tino maliu o Dalton i totonu o se paelo vai, a o u i lalo lona ulu.
O le su a le aiga, o loo faasaga i le Minisita o le Matagluega o Leoleo, faapea foi le Minisita o Falemai ma le Soifua Maloloina i Samoa. O le tamaitai Loia, le afioga ia Leulua‘ialii Olinda Woodroffe, o loo taulimaina lea mataupu, mo le finauina i le faamasinoga.
Sa saunoa Woodroffe i le Samoa Times e faapea, e tele ni vaega o loo tuufaatasia i le su e pei ona faaulufale nei i le faamasinoga. O loo tulituliloa e le tina o lē ua maliu ma lona aiga e tauala i le Loia, le fia maua o se faamatalaga moni ma le sa‘o, na mafua ai le maliu.
E iai ni vaega ogaoga sa ta‘ua i le lipoti a le Komisi suesue a Samoa, sa taitaifono ai le susuga ia Iulai Toma, e uiga lava i lea mataupu, atoa ai ma le tele o isi foi mataupu eseese sa aafia ai le pulega o le falepuipui, ma le Matagaluega o leoleo. O le mafuaaga foi lea, o loo faamalolo lē tumau ai i le taimi nei, lē sa avea ma Komesina o Leoleo i lena taimi.
O le mae‘a ai ona faalauiloa ma faasalalauina le maliu o Dalton i Samoa, sa faamatuuina ai e leoleo se faamatalaga e faapea, sa pule o ia i lona ola. Ae e lei mamao ai mulimuli ane, sa faasalalauina ai le toe faia o se moliaga faasaga i se tasi o alii pagota, e faapea o ia lea sa faaoolima i lē ua maliu.
Ae i le taunuuga o lea faamasinoga ina ua suesueina, sa lē faamaonia ai moliaga o lē sa molia ma tuua‘ia i lea lava mataupu. O le oo mai o le tala, ua o se faafitauli tele sa matuā faanenefu ma osofia ai i le lē mautonu o le tina ma le aiga o Hans Dalton i Niu Sila.
Sa faaalia manino e le tamaitai Loia o Leulua‘ialii Olinda Woodroffe e faapea, o lipoti i le maliu o Dalton, ua matuā lē talafeagai lava, ma ua toe faatietie ai se isi avega mamafa i le tina ma le aiga.
Sa ta‘ua e Woodroffe, ua tatau ma onomea le lē faamaonia o moliaga sa faasaga ma tuua‘ia ai se tasi o pagota, ona o le vaai ma le silasila a le tulafono, e matuā lē mafai e lē na molia, ona faia se faiga faapei ona maliu ai Dalton.
O Dalton ua maliu, o se tagata tino lapoa ma maualuga, a o lē sa tuua‘ia, ua na o se tagata tino laititi tele. O le fesili e ono tulai mai, e faapefea e se tamai tama talavou, ona ia lelemo se isi tama tino ese ma le malosi?
E matuā lē talia lava i se vaai faaletagata ma se mafaufau atamai, ona faavasega lea ituaiga fasioti tagata, pe a fuafua i le tulaga ma se vaaiga sa tulai mai. O le taumafai foi o leoleo ina ia tuua‘ia se tasi i lea lava mataupu, ua matuā alilai mai ai se faiga solitulafono ma le talapepelo.
Ae lē gata i lea, ua aliali ai foi le faia o ni faiga piopio ma le faaufiufi o le mea moni i totonu o le nofoaga i Tafaigata. O le faalauiloa ai o le lipoti faapitoa a le Komisi Suesue ina ua mae‘a se suesuega sa faia i Tafaigata, ua matamata tetele ai nei le moni o tuua‘iga ma faaseā sa masalomia i totonu o lea lava nofoaga.
Aisea ua faasaga ai le su i le malo?
O le fesili lea sa fesiligia ai e le Samoa Times le tamaitai Loia o loo tu mo le aiga i Niu Sila, Leulua‘ialii Olinda Woodroffe. Na saunoa Woodroffe e faapea, o le su o loo faasaga tonu lava i Matagaluega e lua a le malo. O le Matagaluega o Leoleo, sa nafa ma le vaaia ma le puleaina o le falepuipui i Tafaigata, ae o le Matagaluega o Falemai ma le Soifua Maloloina, sa tatau ona silasila i le tulaga o le soifua maloloina o lē ua maliu. Ona talu ai o Dalton, sa ia faaaogāina ni vailaau ma fualaau (medications), mo manaoga faapitoa o lona soifua maloloina. O se tasi lea o vaega tāua tele sa lape ai le sialsila ma le vaai a le Matagaluega.
Ae o le ta‘ua ai o le malo, ma le su faasaga i le malo, ona talu ai a faia se tagi faasaga i Minisita ma Matagluega a le malo, o lona uiga o le malo lava lea, e pei ona saunoa i ai Leulua‘ialii. Sa ta‘ua foi e Woodroffe e faapea, o lona fiafiaga tele, ona ua talia lelei ma ioe le alii Palemia, i se lipoti ma se talosaga sa faato‘ai i ai mo lea lava mataupu.
O le vaiaso nei, o loo iai i Samoa le tamaitai Loia, Leulua‘ialii Olinda Woodroffe, ona o nisi o taualumaga ma talanoaga e uiga i le tele o mataupu o loo ia tauaveina i le faamasinoga i Samoa, ma o le isi lea mataupu o loo laualuga i talanoaga, ma lona iai i le atunuu.
E lei mafai ona faailoa mai e le Loia, poo ā tonu ni vaega o loo faatutu agai i ai le su, aemaise ai o se vaega tupe e ono faanofo filemu ai le aiga o le alii ua maliu.
