O le faailo o le aulia o le tausaga fou 2012 – na faamanatu faatasi e afioaga uma o Samoa ona ua fai faamanatu faatasi ai ma le atoa lelei o le 50 o tausaga talu ona sisi le fu‘a o le tutoatasi o Samoa i le Malae o le Faautugatagi i Tiafau i Mulinuu e pei ona sa iai le aso muamua o Ianuari o le 1962.
O le vaeluaga la o le po o le Tausaga fou na malilie ai aulotu uma i Samoa e faailo lea aso faamanatu tāua i le tatā o logo o falesa uma e faailo ai le aso fou ma le aso fanau o le Malo Tutoatasi o Samoa.
O le faamatalaga a le Alii Palemia i le saunoaga aloaia o le Tausaga Fou, o le a taumafai le Komiti o le Tutoatasi lenei ina ia iai lava se polokalame e faatautaia i masina taitasi.
O le sauniga lotu e aloaia ai le atoaga o le 50 tausaga o le Tutoatasi na faatautaia lava i le aso muamua o Ianuari i le Maota fono o le Palemene o Samoa i le afiafi.
O se sauniga lotu na faatautaia e Ekalesia Soofaatasi ma na faapea ona auai ai sui o le Palemene o Samoa, sui o Malo mai i fafo atoa ai tupu ma tamalii ma le mamalu lautele o Samoa na mafai ona agai i Tiafau i lea afiafi. O le uluai masina la lea ua faalauiloa ai le faailo (logo) mo le tutoatasi. Ua amata nei foi ona tautau i pou moli ma isi nofoaga i le talafatai o le taulaga. O se faailo na tusia e Tuuaga Aviata o Vaiala ma Leiataua Eteuati Jnr o Manono ma Faatoia, ma lo la finagalo ina ia unai le tulaga ua lauiloa ai Samoa o tagata folau o le vasa Pasefika.
O se ata foi ua unai ai le faatāua ua ave i le faigamalaga a Samoa lea ua atoa le 50 tausaga, e lē gata i lea o le tāua o le siosiomaga o le sami e pei ona siomia ai Samoa ma o se faailo o le vasa Pasefika.
O le filifiliga ina ia faaaogā le ata lenei mo le faailo o le Tutoatasi na faaalia e se tasi o Taitaifono o le Komiti o le Tutoatasi a Samoa, le Afioga i le Minisita, Tolofuaivalelei Falemoe Leiataua, o le ata o le paopao o loo iai alii e toalua ma le tamaitai e toatasi o se faailo o le faigamalaga o loo faaauau a Samoa ma e lei faigofie le agai mai o le atunuu i le 50 tausaga o lona tutoatasi, ae o le malosi o le manaoga o Samoa mo lona lava atina‘e ma lona saolotoga ua taunuu mai ai i le matua lea ua iai e aunoa ma se vevesi e pei ona vaaia i isi atunuu tuaoi o Samoa aemaise isi atunuu o le lalolagi.
I le sauniga lava ia o le tutoatasi lea ua faamautu i le vaitau lea e masani ona faamanatu ai le fu‘a o Samoa, le aso muamua (1) o Iuni ma o le vaiaso atoa lea ua faapolokalame e faatino ai fiafia ma taaloga auā le faamanatuina o le Tutoatasi o Samoa.
O loo iai foi le sauniga fai faatasi e faamautu ai le va galulue faatasi o Niu Sila ma Samoa, aemaise o le faamanatu ai o le sainigalima e pei ona faamatuu ai le tutoatasi o Samoa a o i lalo o le vaavaaiga a Niu Sila. Faaalia e Leiataua Eteuati Jnr, o le la galuega lenei na tuufaatasia ai mafaufauga o ia faapea Tuuaga Aviata. O alii nei e faigaluega uma mo le Ofisa o le Faatonu o Fesootaiga televavave faaonapo nei.
O mafaufauga nei e aofia ai le faaaogā o lanu o le fu‘a o Samoa i le faailo lea ua faaaogā nei. O le faamoemoe e tautau uma ata o lenei faailo i soo se itu o Samoa ae o lea ua amata i le talafatai o le taulaga o Apia ma faasolo atu loa i le motu tele i Salafai.
