O le taeao o le Aso Toonai na faatatope atu ai le taavale fuimu mai i Apia ina ua lipotia se faalavelave na aafia ai tama o loo aooga i le Nofoaga mo aoaoga o le Lakapi i Tuanaimato.
O le faamatalaga na aumai e Leoleo ua mafuli le loli o le ituaiga o le dyna lea e feaveaia le fanau o le HPU (High Performance Unit) a le Iuni Lakapi a Samoa. E agai atu iai Leoleo ua amata ona savali ese tama o le au i lalo o le 21 tausaga.
O Aso Toonai uma e momoli ma toe ave e le taavale i le aoga o loo faamautu ai i le mae‘a ai o toleniga. E lei faamautu mai la poo le ā tonu le mafuaaga na mafuli ai le loli ae e latalata i le to‘a 20 alii talavou sa i tua o le taavale.
Ina ua tāpā se faamatalaga mai i le Iuni Lakapi e faatatau i lea faalavelave ona pau le tali, “…ua tuu atu uma faamatalaga o lea faalavelave i le Ofisa o Leoleo”.
Ona pau le tulaga na faamautu mai e lei iai se isi na maumau ai se soifua ma e oo foi i manu‘a e lei iai se isi na manu‘a tuga ma na togafitia uma tama taaalo ma toe agai ai i le nofoaga o loo faamautu ai i Tuanaimato poo o latou aiga foi mo le au tau savali.
O loo faaauau ona toleni faatasi le au ua filifilia mo toleniga auā le aulakapi i lalo o le 21 tausaga a le Iuni Lakapi a Samoa. O lea lava foi la e feaveai lava e le loli lea i soo se nofoaga e faatino ai a latou toleniga. Na faaalia e se sui o le Iuni Lakapi – o le taimi lenei o loo taumafai lava e faaauau toleniga a le fanau a o lei agai i polokalame o le tausaga fou lenei mo taamilosaga faavaomalo o le lakapi.
O le HPU lea ua i le nofoaga fou mo le Iuni Lakapi i autafa o le fale aau i Tuanaimato. Ua aveese ai ma Alafua i le Aoga o suesuega a le Iunivesite o le Pasefika i Saute.
O le vaiaso na tea nei na faalauiloa ai e le Iuni Lakapi a Samoa ua mae‘a le suesuega sa faatonuina se vasega o suetusi latou te faatautaia i seleni maua ma le faasoaga o ia seleni a le Iuni Lakapi.
O se faatonuga na faatautaia e le Taitaifono o le Iuni, le Alii Palemia foi lea ona o le tele o faaseā na laga i le tele o sailiga tupe na faatautaia mo le masii atu o le Manu Samoa i Niu Sila auā le Ipu o le Lalolagi ae e lei manino le faasoaga.
O lea la ua mae‘a ma ua faatali nei “…ni galuega faaiu” a o lei faalauiloa mai lea tulaga.
O se faamatalaga a se sui o le Iuni Lakapi e foliga mai o loo manino lava le faasoaga o nei seleni e pei ona fesiligia ae se‘i tālia pea le lipoti aloaia a suetusi na faatautaia lea galuega mo le Iuni Lakapi a Samoa. E oo mai foi i le taimi nei o loo faatali le faatalanoaina o avanoa o le Manu Samoa i se faiaoga, faiaoga lagolago ma le pule o le ‘au.
O lea sa faasalalau avanoa nei i le faaiuga o le tausaga na tea nei ae o loo tālia pea e oo mai i le taimi nei. Ua faalauiloa foi ma le avanoa o le Ofisa Sili o le Iuni Lakapi a Samoa lea ua mae‘a le konekarate ma o se tofiga sa umia e le Afioga Su‘a Peter Schuster.
E lei faamautu mai e le Ofisa o le Iuni Lakapi pe toafia nisi ua agai atu ni tusi talosaga auā avanoa uma nei e fā.
