Faalauiloa CD pese a le “The Singing Hearts”

O tamaitai talavou o Barbara (Palepa) 16 tausaga le matua, ma Antoinette (Alena) 15 tausaga le matua, ma lo la tuagane laitiiti o Antonio Justice Tuipe‘a o Manurewa, Samata i Savaii ma Levi Saleimoa, ua sauni nei e faalauiloa le latou CD pese fou (vaega muamua) ua ta‘ua ‘Iesu e, ou te Talitonu ia te Oe’ ae o le igoa o le latou aufaipese o le “The Singing Hearts.”
O nei talavou sa amata lava ona pepese mai i nai polokalame a tamaiti i le RadioSamoa ma auai i aufaipese a le latou Ekalesia Katoliko o St Annes i Manurewa, na oo ai ina faaaogā tele i saunigalotu ma faatasiga a le latou Taimua Youth i Malaeola Samoan Catholic Community ma le la aoga pele o St Mary’s College Ponsonby Aukilani. O iina na lagona ai e i latou ua alofaina i latou e Iesu le Agaalofa Mamana i se taleni pei o pesepesega.
O latou mātua o Asiava Tilapoe Atonio ma Antonina Julia Tuipe‘a o loo galulue malosi e fesoasoani i le atinaega o taleni a le fanau.
E faamoemoe foi o lenei fanau o le a faavae ai ma le ‘The Singing Hearts Charity’, o se auala lea e ofoina atu ai e nei fanau se vaega mai a latou taleni mo ē puapuagatia.
O le a faalauiloaina lenei CD i le vaiaso nei, Aso Faraile, aso 3 Me 2013 i le afiafi i le 6.00pm – 8.30pm. O le a faia le tatalo e le afioga ia Patele Michael Endermen e faapaia ai lea afiafi, ona tatala ai loa lea o le faamoemoe.
O le nofoaga o le a faia ai o le Malaeola Catholic Centre, i le 16 Waokauri Place, Mangere (off Tidal Rd) Ulufale – gold coin mo le Singing Hearts Charity. Maua foi sina taumafataga mamā ma faatauina ai CDs i lena po. Ia manuia le faamoemoe i lea afiafi mo le “The Singing Hearts”.