A ta‘u loa ata tifaga ua manatu le toatele o tagata Samoa ua na o papalagi e mafai ona faatino ia galuega, poo Saina poo Initia foi. Ae a vaaia tagata Samoa ua o latou tuufaatasia ni ata tifaga, e ese foi le lagona ma le faagaeetia e oo i ai tagatanuu o Samoa.
O se laasaga tele lea ua vaaia nei i le kamupani a le susuga Tanupo Fiu Aukuso ma lona faletua o Taufau lea ua amata ona faia ma vaaiga masani i itu eseese o Samoa.
O nofoaga ua faamautu ai pu‘egaata aemaise o polokalame faasolo a lenei kamupani. Ua vaaia foi le toatele ane lava o tagata Samoa ua mafai ona galulue faatasi i le tuufaatasia o nei ata. E lē o tele se faamatalaga o maua mai i ata nei ua tapu‘e ae o loo mautinoa le malaga atu ma le toe foi mai o le tamaitai o Taufau ma ua ta‘ua e mafua ona o le ave ai i Niu Sila o galuega ua faatautaia mo ata tifaga nei auā le siaki, tuufaatasia ma le faaleleia atili.
O se miti lenei ua leva ona vaavaai i ai nisi foi ua tele tausaga o galulue i televise i Samoa – peitai o se laasaga e matuā moomia ai le fesoasoani tau tupe aemaise lava i meafaigaluega e tatau ona maua auā le faatinoga o nei galuega. O le foi mai mai i Niu Sila o lenei ulugalii, ua mafai ai loa ona tuufaatasia ni meafaigaluega mo ata tifaga ma ua faatino ai loa pu‘egaata ua vaaia ai afioaga eseese o Samoa.
O le vaiaso lenei na faatautaia ai pu‘egaata a lenei kamupani i le afioaga o Lefaga i le nofoaga ua iai apitaga tu matafaga o le Matareva. O le lua vaiaso lea na amata mai i le vaiaso na tea nei ua faaiu ai loa pu‘egaata mo lenei lava faamoemoe ma atonu o le a lata mai se taimi e faalauiloa ai loa nei galuega ua tau masina o faatautaia e South Seas Pictures.
O Tanupo ma Taufau, o i la‘ua ia na faatautaia le TVSamoa i Aukilani i Niu Sila ma ua mae‘a foi ona o la tuufaatasia ni DVDs mo maimoaga a le atunuu i talatuu o Samoa. O le agai la i ata tifaga ua avea ai le la kamupani ma uluai pisinisi i Samoa lava ia ua mafai ona faalautele atu le tomai i ata tifaga.
O le uluai kamupani fai ata tifaga lenei i Samoa ua faatautaia lava e tagata o Samoa ma e oo i ata ua malamalama a tatou lipoti ua faa-Samoa uma lava le faatautaiga. Ua talafeauga foi lea taumafaiga ma le sauni ai o le tamaitai pese o Lole Usoalii ina ia faatuina se nofoaga e faafofoa atu ai le tomai tau i pese, siva aemaise foi la i taleni faapea e mafai ai ona galulue i ata tifaga ma televise.
O se a‘oga tele ua manatu Usoalii e tatau ona faatū i Samoa ona o le tele o le taleni ua vaaia ae e foliga mai e leai se isi laasaga e mafai ona ausia e fanau o le atunuu o loo iai le manaoga e faalautele ia taleni faapitoa. O kamupani la e pei ona vaaia nei le faatino o a latou ata tifaga o le a le taumate le apo mai mo tama ma teine e iai lenei tomai o le a mafai ona aoaoina i le Aoga ua fuafua le faatu e Lole Usoalii.
