“Ua ou tau le taua lelei, ua iu ia te a‘u le tausinioga, ua ou taofi i le upu o le faatuatua”, o le tautinoga lena a le aposetolo o nuu ese, sa toe tapue ai le soifua faaleagaga faapea le soifua tautua o le autalavou a le ekalesia a Kingston Samoan Assembly of God, a o sauni atu mo lana tauvaga CA (Christ Ambassadors) o le 2014.
E 4 ‘au sa vaevaeina i ai lenei tauvaga, o Efeso, Sarataisa, Laotikaia ma Filatelefaia. E 4 foi vaega (categories) sa tauva agai i ai ‘au taitasi. (1) Pese savali (2) Pese viiga (3) Pese faitaga (4) O Taulaga.
O le tauvaga sa faatinoina i le Aso Sa na tea nei 10 o Aukuso 2014, na tatalaina e le ‘au a le fanauiti, sa taitaia e le faletua ia Foloi Nai faapea le tina matua ia Titi Collins.
O le taitai o le autalavou, o le susuga i le a‘oa‘o ia Sola K. Tavete, o ia foi sa taitaia le sauniga i lea aso, a o le susuga ia Maaelopa F. Tamaletoa, o ia o le failautusi o le autalavou.
O le ekalesia lenei a le Kingston Samoa AOG, o loo i lalo o le taitaiga a le susuga i le alii faifeau ia Pastor Manuula Nai ma le faletua ia Foloi. O le susuga i le alii a‘oa‘o ia Lami Seala Pisa sa fai ma failauga faapitoa o lea aso, auā le fofogaina o le afioga paia a le Atua.
O le ‘au la ua ia mauaina le siamupini o le Tauvaga Faale autalavou (C.A) Kingston Samoan Assembly of God 2014, o le ‘au lea a Efeso, o le ‘au lenei o loo iai tama ma teine talavou a le ekalesia, o loo taitaia e le tamaitai ia Uai‘i Tamaletoa faapea le tamaitai ia Faasiu Puipuifatu.
O le faletua ia Peati Tavete ma Sara Tamaletoa o i laua ia o faufautua mo le ‘au a Efeso. Na faaiuina lea aso i se taumafataga tele na tapenaina e le ekalesia, auā foi uo ma ē masani sa molimauina le faamoemoe, ae faigata foi le fala siisii gata o Pule ma Tumua, sa fai sauniga faatasi i lea aso.
O le susuga ia Sola Tavete sa fai ma fofoga o le ekalesia ae o le afioga ia Sala Asalemo sa fai ma sui o Tumua ma Pule faapea le auvalaaulia sa aofia.
Ua faame‘aina nei la galuega faaleautalavou mo lenei tausaga 2014, ae ua tulimatai nei le faamoemoe i le tausaga fou poo le ā foi se faaaliga fou mai le Atua, auā polokalame CA a lenei ekalesia a le Kingston Samoan AOG i Brisbane, Ausetalia.
