E naumati lagona o le olioli. E pupuna pea e le mātū. Auā o lou aiga ma lou tupuaga, o se faamanuiaga ma o le tofi foi lea mai le Atua. Maeu foi le matagofie i le maitau, o se aiga ae fusia i le fealofani. Auā e afua mai mauga manuia o le nuu.
O lagona ia na faasoaina ma feofoofotai ai augatupulaga e fā, o suli ma feoi faapea alo ma tamafanau a Faoagali Tioga ma Lulu Sulutupe-Faoagali mai i le afioaga o Siumu, ina ua toe poto moli i le futiafu e tasi – e ala i le faatinoina o la latou Faatasiga Faaleaiga, le Faoagali & Lulu Family Reunion 2015, lea sa faatinoina i le Ngati Otara Marae, i Otara, Aukilani i Saute.
Na ulufale ma tatala aloaia lenei Mafutaga mai le aso 25 Novema seia faaiuina i le Aso Sa 29 Novema.
Sa amatalia le faatasiga i pelega o le aganuu i le ‘ava o le feiloaiga, e pei ona sa faatinoina e le augatupulaga tolu ma le fā o le aiga o loo aumau i Aukilani.
O i latou foi ia sa gafataulimaina le taliina ma le faafoeina o le polokalame atoa. O se faatasiga sa molimauina ai loimata o le olioli ma le faafetai o le aiga atoa, pe tusa o le 150 le faitauga o i latou sa auai, auā o lupe sa vao eseese ae ua toe faatasia le toatele ona o lenei faamoemoe.
O lena faitauga e aofia ai le to‘a 11 sa malaga mai Amerika, 20 ma ona tupu na malaga mai Ausetalia, 10 ma ona tupu na malaga mai Samoa ma Amerika Samoa, aemaise ai o le toatele mai isi vaega o Niu Sila e pei o New Plymouth ma le atu Taranaki.
O lenei foi faatasiga sa auai mai i ai toe ulutaia poo tuaa sinasina e to‘a 4 o loo soifua pea mai i le to‘a 12 oi latou, ma ua siliga i le ta‘i 70 tausaga o latou soifua pea, e pei o le afioga ia Te‘o Viane Faoagali na malaga mai Ausetalia, o le tina matua ia Tina Timu o loo aumau i Aukilani, le faletua mālōlō manumalo ia Lina Vaevae Eteuati na malaga mai Amerika ma ona alo, faapea le fetalaiga ia Faoagali Filipo na malaga mai Samoa ma lona tausi ia Tafale faapea nisi o le aiga, ina ia auai i lenei faamoemoe.
O se tasi o tulaga mataina o lenei faatasiga o le taimi na tolaulau ai aofaiga o alo ma fanau na tutupu mai ia i latou e 12 o suli faavae mai ia Faoagali Tioga ma Lulu.
E lē i lalo ifo o le 80 ma ona tupu le aofaiga oi latou na tupuga mai faletama poo suli faavae taitoatasi. E pei o le 165 oi latou na tutupu mai i le ulumatua o suli faavae nei, le tuaa sinasina ia Luisa Kaisarina Fea Gago, ua fai i lagi le folauga.
O ia tulaga na matuā oo ane ai lagona o le faagaeetia ma le faafetai i le aiga atoa na potopoto ai mo lenei faamoemoe, ona ua maitauina le faatupulaia o le fuainumera o le aiga. Ma ua atagia ai le alofa tunoa o le Atua e ala i ana faamanuiaga i meaalofa ma taulaga tagata, ua Ia faaoloaina ai le aiga. Aemaise e tali tofu lava suli faavae o lenei aiga ma taulaga tagata ua avea o ni lupe faalele, ma suivaaia o le Atua, i totonu o fata faitaulaga eseese o loo ua galulue ai.
E pei o le susuga i le faafeagaiga ia Reverend Iosefa Rimoni, o loo galulue ma le faletua i totonu o le Ekalesia EFKS i North Shore, faapea le susuga i le Toeaina, Reverend Elder – Paulo Eteuati, i se tasi o Ekalesia Penetekoso i le setete o Kalefonia i Amerika.
O se faatasiga foi na amataina i le leo o le alaga o le olioli, ma na faaiuina i le manuia ma le fiafia, ona o se faamoemoe sa uluai faatinoina i totonu o Compton, i Kalefonia Amerika i le tausaga e 2013. O le faatasiga lona lua lenei e pei ona faatinoina i Niu Sila 2015, ma le faatasiga ua taoto nei i Paga, ma ua faamoemoe e faatinoina i Samoa, ia Ianuari 2017 pe a aulia manuia i le soifua ma le malosi.
