Toalima alo Pasefika faamanuiaina i sikolasipi a le Palemia

O le Aso Lua na tea nei na faatumulia ai le maota o le Palemene i le Laumua i malo faaaloalogia, mātua ma uo na auai i le tufatufaina o faailoga sikolasipi a le afioga i le Palemia ia Toosavili John Key mo alo Pasefika i lenei tausaga.

O i latou nei na faamanuiaina i matata eseese:

1. Antony Vavia – Science Technology, Engineering & Mathematics o se alo mai Niue

2. Sione Faletau – Arts Creativity, ma o loo alo atu e saili le fomai (PhD) i mea tau fine arts, o se alo mai Tonga.

3. Grace Liairi – Business, o se alo mai Fiti

4. Tarimar Schuster – Sports and Fitness, o se alo o Samoa

5. Leorida Peters – Leadership and Inspiration – O se alo Samoa mai Faleatiu ma Vailima. Sa auai si ona tina faapea le tina o lona tina ia Leonesa Mafaufau e lagolago le manumalo o Leorida ma faaalia lona faagaeetia i taumafaiga a si ona alo.

Na taitaia le faamoemoe i le sauniga lotu na saunoa i ai le susuga i le faifeau ia Andrew Afamasaga. Sosoo ai ma le faafeiloai a le Pule CEO o le Ofisa o Tagata o Atumotu le susuga ia Pauline Winters, sosoo atu le saunoaga faafetai ma le faamalo a le Palemia i le aumanumalo, faapea ma le saunoaga faamalo a le Minisita o Tagata Pasefika le afioga ia Peseta Sam Lotu-Iiga ona faaiu ai lea saunoaga tofia o le faamoemoe.

O le alii faafiafia na manumalo i le faailoga o le Musika faale-Tusi Paia i faailoga a le Pasefika i le tausaga talu ai, o Salatielu Taotua mai Salelologa ma Satupaitea na ia faafiafiaina le mamalu o le aofia i ana musika logoleleia.

O le Fofoga o le polokalame o le aso na feagai lea ma Iavana Seuala mai Lalomanu, Leulumoega, Faleasiu ma Tuanai. O se MC pito i laitiiti lenei e 14 tausaga ae ese le tomai ma le to‘a i le faatinoga o lana matafaioi mo le faamoemoe.

Na ia faatautaia foi le polokalame o tufaga faailoga o sikolasipi i le tausaga ua mavae i le maota foi o le Palemene. Talosia ia ona maua se sikolasipi faapenei i le lumanai.

Momoli atu le faamalo ma faamanuiaga a le ofisa o le tatou nusipepa i nei alo o le Pasefika i le sogasogā ma le finau i le atamai i soo se matata lea ua manumalo i faailoga poo sikolasipi tau tupe mai le $5,000 e oo atu i le $10,000 e toe faaauau ai taumafaiga i Iunivesete eseese.