O le taamilosaga a le Super Pasifika Kirikiti Tournament na faataunuuina mo le 4 aso, na toe agiagia ai foi le fu‘a a le Maata mai le alalafaga o Samata i le itu Salega mai le motu tele o Salafai i le taaloga mulimuli ma le ‘au malosi a le Tauafiafi, lea na sailia ai le siamupini o le taamilosaga lenei i le Aso Lua na se‘i mavae atu nei.
E ono ‘au kirikiti sa finauina lenei taamilosaga ma na toe sailia ai lava e le Tauafiafi mai New Lynn ma le Maata mai Samata le siamupini ma o ‘au foi lava nei sa finauina le siamupini o le tausaga 2009, ma ua tumau ai nei lava le manumalo i le ‘au kirikiti a le Maata o le tausaga 2011.
O se taaloga mataina tele le finauga i nei ‘au malolosi auā e lua taaloga sa faia o le final ma na manumalo a‘ia‘i ai lava le Maata.
O le tofa ia Asiava Atonio o loo feagai nei ma le faafoeina poo le kapeteniina o le ‘au malosi lenei a le Maata faatasi ai ma le lagolago malosi a le afioga ia Loli Lapana, aemaise foi le tuualalo a le ‘au matutua ia Taupo Aloi ma Tia Sape.
Na tulaga tolu mai le Maata i le taamilosaga a le Kirikiti faa-Samoa moni lea na manumalo ai le Ainiusami ae tulaga lua ai Tama ….. O loo ua faagasolo nei foi la le taamilosaga a le PIMKA lea na amataina i le Aso Toonai o loo taaalo ai foi le au malosi a le Maata.
