O le tausinioga i taua o mafaufauga e lē faigofie, se‘i vaganā ua mafuta i le Atua i taimi uma ma tuu atu atoa i ai le loto ma le agaga, ona mafai lea ona laasia le taunuuga.
O le po o le Aso Lulu o le vaiaso ua tuanai, na faamae‘aina ai le suega faaiu o le lua tausaga mo i latou sa a‘otauina i le uluai taimi na tatalaina ai lenei Aoga faale-Tusi Paia i le tausaga na tea nei 2009.
O lenei aoga, o le toe faaauauina lea o le Kolisi autū a le aoga ua igoa “Ia Malamalama Agape Bible College” i Ueligitone i Niu Sila, e pei ona faauluulu i le susuga i le alii pule aoga, Pastor Peniamina Williams.
O le mataupu mulimuli sa suesueina i lenei tausaga o le Intro to Mission, o le toe faamanatu lea o le galuega faamisiona a Iesu na faia i luga o le fogaeleele.
O le susuga i le alii faiaoga Misionare o Timoteo Williams na ia aoaoina lenei mataupu.
O lenei aoga e i lalo o le faamalu a le Ekalesia faapotopotoga a le Atua (A.O.G) ae o i latou o loo aoaoina ai, o sui mai isi tovine tapuai faatasi ai ma nisi lava o le A.O.G.
E lē faapito lea aoga i se ekalesia ae ona o le manatu maualuga ma le naunautaiga i le faafeagaiga ia Pastor Peniamina Williams faapea isi faafeagaiga ma le ofisa, ia mafai ona faasoa atu ma faalauteleina pea le silafia i Afioga Paia a le Atua.
Na mae‘a le suega i le po o le Aso Lulu a o le po o le Aso Tofi na sosoo ai na faaiuina ai i se sauniga lotu ma se taumafataga tele.
Sa mafuta atu ai aiga ma uo faapea nisi o le au faigaluega a le Atua, e siitia ai le viiga ma le faafetai i le Atua, ona ua taunuu mai i le faaiuga o le lua tausaga.
O se sauniga na vaaia ai loifofoga o le fiafia e ala i molimau eseese a i latou sa a’otauina i lenei lua tausaga, ona e lē faigofie lenei tauiviga.
Ua sauni atu nei la mo le Faauuga (Graduation) i le faaiuga o le masina fou, ma e to‘a 30 i latou ua alo atu i le seleselega.
O le ofisa a le a’oga a le Kolisi i Brisbane: Principal – Pastor Peniamina Williams; Chairman – Elder Pastor Alaivanu Toma; Head of Administration – Pastor Ferdie ma Suzietina Jankie; Resitala – Suzietina Jankie.
O le Peresitene o le vasega o le susuga ia Terry Filimaea Fauea.