O le tala fiafia lenei mo nai tamā ma tina ua afu le soifua, o loo alaala i le faaitu lea i Magele poo isi vaipanoa latalata ane.
O se nofoaga e lē fou i le silasila auā ua tele tausaga o faatino ai lenei lava auaunaga mo le tausia o tamā ma tina matutua e pei ona sa iai i nisi o pulega tuai. Peitai ua iai nei se isi kamupani ua sii o latou aao, latou te fiafia e toe faafou ma toe faaauau lenei tautua, auā le saunia o ni nofoaga e lelei ma talafeagai mo le tausiga o nai tuaa matutua.
O le Bupa Care Services, ua latou umia nei le puleaina o lea nofoaga i Magele i Aukilani i Saute.
O le fale lenei o loo i le tulimanu o James Road ma Massey Road. Ona o le silasila a le pulega i le faatupulaia o le aofaiga o nai tamā ma tina matutua i totonu o lenei faaitu o le atunuu, ua faatulaga ai ni moega talafeagai e 91 mo lenei falemai fou mo tagata matutua.
E pei ona silafia, o lenei fale, le Culverden, na tapunia i se faaiuga mai le Counties Manukau District Health Board ia Ianuari o le tausaga nei e 2010, ona o le tele o faitioga ma lipoti i le leaga o le faatinoga o le auaunaga.
O le galuega fou lenei o le a faagasolo, ua iai le fuafuaga ia oo atu i le amataga o le tausaga fou ua tatala ma amata i ni moega e 41, ona sosoo mai lea o isi moega e 50 i le ono masina mulimuli mai.
O le a suia le lanu o le fale ma nisi o foliga i le pito i fafo, e toe suia atoa le nofoaga e faataunuu mai i ai tagata (reception & lounge area), e toe faafou foi le itu o loo faatino ai galuega faafomai, aemaise se vaaiga fou i fafo i le teuteuina matagofie o le laufanua i togalaau.
O loo galulue soosoo tau‘au le Bupa Care Services ma le Counties Manukau District Health Board i lenei galuega tāua, ma o le sini autū, ia saunia se nofoaga e talafeagai ma faamalieina ai manaoga o nai o tatou tuaa matutua ua moomia e i latou lenei tausiga faapitoa.
E lua ni igoa na faia i ai le filifiliga a le Bupa mo le faaigoaina o lenei falemai, ae sa tuu le avanoa i tagata uma o lea faaitu i Magele e faailoa ai ni o latou manatu, poo fea o nei igoa e lua o le a fetaui tonu i le fale, ona fai lea o se palota.
O igoa e lua – “David Lange” ma “Newhaven”. Ua filifilia le igoa “David Lange” e manatua ai foi le sao tele o lenei taitai i totonu o le itumalo o Magele, ae o le igoa “Newhaven” o loo afifi atu ai se lagona o se olaga toafimalie ma le saogalemu o le a maua e nai tuaa matutua a o tausia i totonu o lenei nofoaga fou.
O le aso 30 o le masina na tea nei na tapunia ai le avanoa mo le filifilia o se igoa.
E tusa ma le $2.3 miliona le tupe ua faaaluina e lenei faalapotopotoga, le Bupa Care Services mo le toe faafouina o lenei nofoaga. E tusa ma le 45 fale faapea o loo pulea e le Bupa ma ofoina ai lenei auaunaga i vaipanoa eseese o le Niu Sila, mai lava i Whangarei e oo atu i Timaru.
