E leai se faatapulaa o ni tausaga o le soifua a‘oa‘oina, e leai foi se pa puipui e taofia ai le faalauteleina o le atamai, poo le toe foi i le aoga e faaauau ma saili malo, auā foi o le ola a‘oa‘oina o le penina tautele na te faafeao ia te oe i soo se mea.
O le polokalame tau a‘oa‘oga e pei ona faatinoina e le Hagley Adult Literacy Centre (Education Provider), lea e fesoasoani ai mo tagata o le Community e a‘oa‘o ai le gagana Peretania, o mataupu tau komipiuta, aemaise o le toe tilotilo i nisi o auala e faafaigofie ai le faamalosia o le loto finau ma tauivi ia maua le poto salalau, ma ia faigofie ai ona maua ni galuega.
E lē gata i lea e aoga foi mo nai tamaiti aoga ua iu mai le kolisi ae o loo manaomia pea le faaauauina o le iloa talu ai ua vaivai le itu tau seleni, ua fiu e saili ni galuega aemaise ai o nai mātua o loo nonofo i le fale, o le avanoa tāua lenei ua maua e toe faamumū ai le lamepa mo le mafaufau.
O le Aso Lua 30.11.2010 sa faaiuina ai galuega a lenei aoga tāua i le tufatufaina o faailoga o lenei tausaga mo i latou sa auai, ma ua silia i le lima tausaga o faia pea lenei taumafaiga.
I se saunoaga a le tamaitai pule Claire Taylor na ia faaalia ai lona fiafia i le sogasogā ma le finau o tatou tagata Samoa, aemaise o foliga ‘ata‘ata i taeao uma e usu atu ai ma e pei lava o se auaiga e tasi i le taimi o aoga.
O le fuainumera o tagata pasia mo lenei aoga e tatau ona i le 10-16 le aofai, ae lē faatapulaaina le soifua.
O nisi mātua ua ta‘i 60 tausaga ae na taumafai lava e pei o le faletua o le susuga i le Toeaina, Tino Vanilau (AOG), o le agaga fiafia lea na faagaeetia ai le tamaitai pule.
O le alii faiaoga o Simon Puddle ma le faletua o Mele Tafua sa pale feagai ma le faafoeina o le galuega i le tai tolu kuata o le tausaga.
O lenei lava aoga (Provider) e toatele i alo ma fanau Samoa aemaise foi o le au matutua, ma o loo tatalogo mai pea Masefau i o tatou tagata ina ia faaaogā lenei avanoa tāua, ona e aoga fua e leai se totogi auā o loo faatupe mai e le malo, ae maua ai lou tusipasi e iloa ai omiomi le komipiuta ma le silafia i le gagana Peretania. Faamalo tauivi, faamalo finau, faamalo le onosai, ma faafoi ai le viiga ma le faafetai i le Atua.
