O le tupu ma le ola o le galuega a le Ekalesia Katoliko a le Aiga Fesilafa‘i a Vaitele Fou ma Nuu Fou i Samoa, o le ala lea o le savalia o le ala o le mativa i le aai o Brisbane nei, ona o le manaomia mo se mauga tapuai. E tusa ma le 70 matafale o le matagaluega ma e lē taulia ai tagata lautele e faatasi atu pea i sauniga.
I se faatalatalanoaga ma se vaega o le aufaitofi a le aumalaga na ta‘ua ai, ua leva na tatau ona faatelē le falesa ona ua lē ofi, peitai sa fuafua mamao mai pea.
O loo malaga mai le tamā pule o le Matagaluega, le afioga ia Patele Muli‘au Stowers, o ia foi o le faatonu o tupulaga talavou a le Ekalesia Katoliko i Samoa. E to‘a 52 le aofai atoa o le aumalaga.
O le taitaifono o le tofā ia Molioo Fonoti Pio Molioo, Failatusi o Pau‘ulu Iupeli, teutupe o Ester Leanapapa Laki ma le sui taitaifono, o Muliagatele Silva. Na afea muamua e le aumalaga Melepone ma talimalo ai le afioga ia Patele Paletasala Leota ma le matagaluega Katoliko.
E lē mafaamatalaina le alofa foai o le mamalu o Samoa o alaala i Melepone. Na o latou foaia ai se seleni e tusa ma le $35,000. E lei gata ai i lea le aao mafola, sa mafai ona latou foaiina ni mea fai faaili mo le aumalaga mai Samoa ma nisi o valevalealofa sa faatinoina.
O le po o le Aso Tofi na faafiafia ai le autalavou e to‘a 42 i Brisbane nei, ma na matuā vaaia le faatumulia ona o le agaga fia fesoasoani o soo se tagata. O le lotogatasi o le Matagaluega Katoliko i Brisbane faapea aiga ma uo sa mafuta atu, i le agaga fia foai mo le galuega o le malu o le Atua i Samoa, na mafai ai ona iu manuia le faamoemoe.
E ui ina loulouā le tau i le Aso Toonai na tea nei, 4:12:2010, peitai e lei faafiti ai le alofa i le lagolagoina o le faatalauula mai a le afioga ia Patele Muli‘au Stowers ma le aumalaga Aiga Fesilafa‘i a Vaitele Fou ma Nuu Fou.
O le taimi nei ua i aao nei o le aumalaga mai Vaitele Fou ma Nuu Fou o le Aiga Fesilafa‘i Ekalesia Katoliko se seleni paia e tusa ma le $88,000 afe tala Ausetalia.
