Soo se vaega o le lalolagi e aumau ai se Samoa e mitamita lava i lona faasinomaga ma tauave ana tu ma agaifanua. O le tulaga lea o iai se aumalaga galulue faavaitaimi i Sini nei mo le ono masina auā le sailiga manuia mo nai aiga, nuu, ekalesia ma itumalo o loo tapuai mai.
O galuega o loo feagai ma i latou e lē faigofie ma ua uma foi ona fautuaina i Samoa i le amio pulea e faamuamua auā o amepasa i latou mo le atunuu. Ae peitai o le uma o galuega a nei alo o Samoa na auai atu ai i le faleaiga Samoa e faatau sa latou taumafataga o le afiafi ae otegia ai i latou e se tina Samoa na iai auā sa laei atu o latou ofu o le Toa Samoa ma ie lavalava i le faleaiga Samoa.
“O lea vaiaso a o loma le taaloga a le Toa Samoa ma Ausetalia na faaali lo matou mitamita i le tatou ‘au ma faailoa ai foi la matou lagolago i le taaloga a nai uso ua iloga ai le igoa o Samoa i Ausetalia ma le lalolagi ae te‘i lava ua oso mai se ina Samoa lenei ma osofai matou,” o se saunoaga lea a si alii talavou ia Anthony Posini.
“Fai mai lenei tina e ese lava Samoa ese Ausetalia ma e lē tatau ona o matou omai ma ia lavalava faapea ua maasiasi ai lona tagata. Sa lagona lo matou meia ma le faanoanoa tele i lea tala a le fafine a o la e tumu solo isi tagata Samoa o taumamafa i lea taimi.”
“Sa fesiligia matou pe matou te omai Samoa ma o matou tali filemu i ai o lea lava ae atili fai mai ai e matagā la matou mea lea ua fai ua ma lava lona tagata. Na umi lava ona fai le sauniga a le tina ma tuu maualalo laei Samoa i lalo a ua atili vaavaai mai ai nisi ia matou.”
Sa maua foi e iai nisi tagata Samoa na laei o latou iefaitaga ma mitiafu Samoa i lea faleaiga aemaise o le pitonuu lava lenei e tofu ma faleaiga Initia, Arapi ma atunuu eseese e ofu atu lava laei o latou tagata ma le saoloto.
“Na uma loa le sauniga a lenei tina matou savali loa ma le maasiasi i la matou taavale ma lagona ootia. O le tulaga faanoanoa o le masina atoa lea o le siitia e nai uso o le Toa Samoa o le igoa o le atunuu i Ausetalia ma le lalolagi lea e vaaia ai le sulu o o latou ie i mea e afifio solo ai ma silasila i ai le lalolagi i laei Samoa, ae peitai o lea sa tuu i lalo e lenei tina matou ofu Samoa.”
“O lenei foi avanoa ua matou maua mai e galulue ai mo le tauina ma le totōina o le kapisi e ui o le faigata ae fai lava ma le loto auā tapuaiga a aiga ma mātua. O le itula e lima i le vaveao e amata ai ae a vevela tele loa le la ua manava i le sefulu poo le sefulutasi i le taeao ma e pei o le nimonimo o malae lakapi e fā le mamao o fanua e totōina ai le kapisi, ma o le fili lava o le papatua auā e punou lava i le aso atoa.”
“E ui i lea e iai nisi ua malaga faatolu mai e pei o le susuga ia Simanila Tuilaepa mai Sapapalii ma le tamā ia Ekapoti Sauvao Maiava mai Faleasiu ma Salelologa.
O le uluai malaga i le 2012 na ou foi atu fai lo‘u fale. O le tausaga talu ai na faatau ai la‘u taavale ma o le tausaga nei o loo fuafua i se isi atinae.”
