E lē tau fesiligia le sasaa mai pea ia Samoa o le tamaoaiga faasoa o le Malo o Saina ma ua atili maumau ai fao ma uamea o sootaga o atunuu e lua. Ua tele foi tala ma lagona faaalia o le au fai mafaufauga i le sōsō mai pea o Saina e faauouo ma opogi atunuu o le Pasefika e pei o Samoa, ma atili tumatilatila mai ai i luga o le mauga le agalelei o lea malo tele ma ua matuā malosi lona tamaoaiga, faapei o le malo tele o Amerika.
O le Aso Toonai na tea nei na feiloai ai le Palemia o Samoa ma le Pelesetene o le Malo o Saina o Xing Pingping lea na sainia ai ni maliliega e faasino i le faatinoina o nisi o fesoasoani a lea Malo mo le atunuu, poo ni memorandum of understanding.
O se tasi o fesoasoani na faamautu ai o le faatupeina lea e Saina o le toe fausia o nisi o fale o le malaevaalele faavaomalo. O le fale o loo tapuvaetasi i ai faigamalaga lea e faaee ma taunuu i ai pasese, o le toe fausia i se isi vaaiga fou e sili atu nai lo vaaiga o iai nei.
Na faailoa ane i le tusitala ma nisi o sui faasalalau mai Samoa e le Amapasa o Samoa i Saina le afioga Tapusalaia Terry Toomata, le ata o le galuega a o maua se feiloaiga ma le amapasa i Nadi i Fiti i le Aso Tofi na tea nei, ma ua mautinoa ai o le galuega lea o le a fausia ai loa ma vaega e pei ona vaaia i malaevaalele tetele i fafo, lea e taunuu se vaalele ona tu tonu ai lea ma malaga ese, pe faaee foi se malaga e aunoa ma le toe savali i lalo ma le vaa ma agai i le fale.
Ua uma ona faailoa e le taitai o le Malo lea galuega, peitai o lea faatoa mautu mai ma faamaonia o le malo o Saina o le a faatupeina i ana fesoasoani mo Samoa.
E pei ona silafia tasi lea o faaletonu o loo iai lo tatou malaevaalele i Faleolo, o le taunuu o vaalele i le taimi o loulouā le tau i ni timuga ae tau agai atu tagata faigaluega ma faamalu mo pasese e lē gata i le taimi e tuua ai Samoa ae o le taunuu. E pei foi ona vaaia lea tulaga ina ua taunuu le malaga a le vaalele tele 737-800 o le Fiji Airways i le afiafi o le Aso Tofi na tea nei, na malaga mai ai le tusitala, na fetaui tonu ma le palasi o timuga peitai na taufetuli faatimu le pasese i le fale e siaki ai pepa malaga ma uta, ona ua leai ni faamalu.
E iai le talitonuga o le a lē toe vaaia ia tulaga pe a mae‘a le galuega o le a faatino e Saina ma tutusa ai loa le malae vaalele i Faleolo ma isi fale mo pasese o loo i isi atunuu o le Pasefika e pei o Fiti tainane Niu Sila ma Ausetalia o loo malaga i ai le atunuu.
E tusia lenei lipoti e lei maua mai le aofaiga tonu o le tau o lea galuega, aemaise o isi fesoasoani a Saina ua toe masaa mai i le Malo o Samoa.
