O se aso tāua lenei i le tamaitai o Lillian Sio, aemaise foi o nai ona tuaa o Victor ma Lupeuluiva Sio, o le Aso Faraile, aso 3 o Fepuari, auā o le aso na faamanatuina ai le 21 tausaga o le tamaitai, o Lillian Sio.
O ona tuaa, le tamā ia Victor Sio e mai le afioaga o Vailele, a o le tina ia Lupeuluiva Sio e mai le afioaga o Vaiusu.
Na matagofie na‘ua le aso ona o le mamalu ma le paia o le auvalaaulia na afifio atu, faapea foi aiga o nai ona tuaa, faatasi ai ma le tele o ana uo ma paaga mai taimi o feagai ma aoga, atoa ai ma ana uo mai isi atunuu.
O le faamanū ma le viiga o le Atua na amataina ai le aso e ala i le faigalotu, sosoo ai ma le taumafataga, ona alo ai lea o alo ma fanau a le aiga ia latou faafiafiaga mo lo latou tuafafine aemaise le auvalaaulia, ona tauaaoina lea o le ki, lea na saunoa le susuga a Victor, o le ki na saunia e le grandmother o Lillian o loo i Niu Sila, le tina ia Leone Poe, lea na lē mafai ona auai i le faamoemoe ona o gasegase o le tino.
Na taape le au valaaulia ma le mama ua lomi ona o faaaloaloga, ae pepese fiafia le tupulaga ona o le manaia o le musika na sisiva ma faamanuia ai le aso fanau o si a latou uo o Liliana.
E momoli atu ai foi alofaaga o la tatou auaunaga i le aso soifua o le tamaitai o Lillian. Happy Birthday Lillian!
