E lei faigofie le sailiga o le siamupini i le taamilosaga taitoa fitu e pei ona finauina i le fetauiga i le va o le aulakapi Old Boys ma le Samoa United sa faataunuuina i le malae taalo i Woodend i le Aso Toonai na se‘i mavae atu, lea na matuā soloia ai atumauga o Canterbury ae toe sola foi le Samoa United ma le siamupini ina ua manumalo i ‘ai 26 – 5.
E 24 le aofai o aulakapi sa tausinio ai mo le taamilosaga faaletausaga ma na vaevaeina i pools e 8, o se aso sa faatumulia i le au tapuai aemaise fanau a o iai i malologa ma tuuaga o aoga.
Na matuā aasa le finauina o semi finals e lua i le taaloga a Samoa United (14) ma Marist Albions (10), faapea High School Old Boys (27) na manumalo ia Christchurch (20).
Peitai ina ua taunuu mai i le taualuga e sailia le siamupini, e lei alu faatamala le au a Samoa United ona talu ai e paoa malosi, tino lelei toe saosaoa tele le au a tama tuai o le Old Boys.
Na faaalia e le alii faiaoga taiulu, So‘oalo Alatimu Iese e faapea, o le latou game plan ia taumafai e poloka i taimi uma, mataalia aua lava ne‘i tuu avanoa i le Old Boys ona e pei ni tamai vaalele le saosaoa o tama pe a oo ina sao, lea na tauia i le fiafia ina ua latou maua sikoa faatopetope e tolu i le amataga o le taaloga ma ua malolo ai le au a Old Boys.
Ua toe umia nei e Samoa United le Ipu o le taamilosaga 2012 e pei ona latou manumalo ai foi i le tausaga 2011.
Talu lava ona tulai mai le Samoa United i le tausaga 2008 e lei foi fua lava i sana taumafaiga e pei ona faamanuiaina i le Plate Winner 2012 (Murnham) & Plate Winner (Sa‘oao & Aumaga Pasefika).
O le manatu maualuga mo nei taamilosaga e pei ona faalauiloa mai e So‘oalo Iese, ia filigā tama taalo e finauina le taaloga, faamalosia le taleni ma ia faatupulaia le tomai aemaise tulimatai le moemitiga ia filifilia mo isi levels luga atu.
O loo faamanatu foi i tupulaga le amio pulea e lē gata i totonu o le malae a o fafo atu i soo se nofoaga faitele. Na ia faaalia lona agaga faafetai i mātua ma aiga o tama taaalo faapea le mamalu lautele o i latou lagolagoina le Samoa United i soo se taamilosaga.
O suafa o le pulega: So‘oalo Alatimu Iese (Coach), Sefo Tugaga (Asst Coach) & Management: Vitale Ilalio, Fiu Sefo, Fata Siliva, Maatusi Fesolai ma le alii kapeteni (Faigame Tevita) ma ua faasauni atu le au siamupuni mo le taamilosaga lakapi Sa‘oao & Aumaga i Dunedin lea ua tolopo e faataunuuina i le aso 25.02.2012.
