O upu masani a le Tusi, o le ava i mātua e faalevaleva ai aso o le soifua. O le talitonuga lea o le toatele pe a aulia e se tasi ni tausaga se tele aemaise lava pe a tea le 70 ae faasolo atu i le 80 poo le sili atu foi tausaga o le soifua. O lagona uma lava ia na ufitia ai le toatele o le au valaaulia, o uo ma aumea mamae aemaise o le fanau ma aiga uma e faasino i le tina matua o Mekrita Tuuina Tafili Leota, ina ua faamanatu lona 80 tausaga i se sauniga lotu ma se taumafataga felanulanuai sa faia i se tasi o maota poo hall i le pitonuu o Naenae i Lower Hutt i Ueligitone Niu Sila i le Aso Sa tonu o Tina ua mae‘a atu nei.
O se tasi lava o alo e faasino i le tina o Makerita, le susuga i le faafeagaiga Tuuina Leota na feagai ma le sauniga lotu na sii ai le viiga ma le faafetai i le Atua ona o tausaga e tele ua aulia e le tina, o se faailoga o lona alofa lē faatuaoia ua faaopoopo ai pea tausaga i le soifua o le tina mātua e mafuta ai ma le aiga ma le fanau. O tatou uma lava a aulia e se tasi o mātua nei tausaga e tele e tatou te ofo ma faapea ane, e maeu le agalelei o le Atua.
O le tina o Makerita sa mau lava i Samoa ma le fanau, ae o le sailiili manuia o le tina ma si ona toalua le susuga Tafili Tuuina Leota, ua 30 tausaga talu ona fai i lagi lana folauga, na masii mai ai i Aotearoa se vaega o le fanau ma faamautu ai, seia oo ina malaga uma mai le fanau e to‘a valu ma famautu ai i Ueligitone lea ua faatasia ai ma le tina seia oo ina aulia le valu sefulu tausaga o lona soifua. O molimau ia o lona aso fiafia, ona o se tina sa lē faalogologo tiga i le sailiga o se lumanai o le fanau lea ua mautu uma ai ona alo i Niu Sila ma galulue ai, seia oo ina faaipoipo nisi o fanau o lana fanau ma ua tupu ma ola ai lona aiga.
O faamoemoega uma lava ia o tatou mātua ma aiga, ae amuia lenei tina ua faafualoa pea lona soifua e mafuta ai ma le fanau. O se tasi o ona tuagane sa malaga mamao mai Amerika le afioga Lilomaiava Logi ona o le fia auai ma fia feiloai i si ona tuafafine e toatasi ua leva tausaga e lei toe fevaaia‘i ona ua valavalava i atunuu o loo aumau ai.
O le tofa poo le fetalaiga Loli Sila o se paolo i se tasi o alo tamaitai o le tina matua, na fai ma fofoga o le aso. O ana teuga ma faaaloalo lea na matuā faasopolia ai le auvalaaulia i le taumafataga lava saunia, aemaise o faaaloaloga masani a le atunuu. Na malaga mai foi i Samoa se tasi o le aiga o le tina matua faapea nisi o fanau e faasino i nisi o ona tuagane e aumau i Aukilani mo lona aso soifua.
Na maualuga foi ma mamalu le faamoemoe ina ua auai nisi o aiga ma uo aemaise le mamalu o le ekalesia Assembly of God i Upper Hutt o loo tausia e le susuga i le faifeau o Tuuina ma le faletua o Pau. O le upu moni na ta‘ape le mamalu na auai ma le faamalieina i le tele o taumafa aemaise o le laufofoga fiafia o le fanau e faasino ia Makerita ona o le lava tapena i vaega uma.
O moomooga alofa mo le tina ia saga foai pea nisi aso ma tausaga e mafuta ai ma le aiga ma le fanau. Haapy birthday Makerita, amuia lava oe ua aulia nei tausaga e tele.
